SHILLONG:
U Chief Electoral Officer (CEO) ka sorkar jylla u Bah F. R Kharkongor u la ong ba ka jingpoi ka jingthep vote hapoh ka Sohïong konstitwensi ha ki 63 tylli ki jaka ka long haduh 91.87 percent, kaba long kham kiew bha ban ïa ki snem 2018, kaba long 90.46 percent.
Haba kren sha ki lai pathai khubor hadien ka jingpyllong ïa ka jingthep vote, u Bah Kharkongor u la ong ba jingjied ïa u nongmih khmat sha ka Iing Dorbar Thaw Aiñ ka Meghalaya na ka bynta ka Sohïong Assembly Konstitwensi, ka la long kaba ïaid beit ïaid ryntih khlem da don kano kano ka jingpynthud pynwit.
“Haduh 34,783 ngut ki nongthep vote ba kynthup ïa 17,096 ngut ki shynrang bad 17687 ngut ki kynthei kiba la wan thep vote, ha ki 63 tylli ki polling station bad kane ka pyni ïa ka jingkiew ki kynthei haba ïanujor bad ki shynrang bad mynta ka sngi ruh la ïohi ïa ka jingwan ïashim bynta shitrhem ki kynthei ruh ka la kiew bha”, la ong u Bah Kharkongor.
U Bah Kharkongor u la ong ba ka jingbun ki nongthep vote ha kane ka sngi ki wan bha ha ka por mynstep bad ha ka por ba la jan kut. “Ha kiba bun ki jaka thep vote hapoh ka Sohiong konstitwensi ki nongthep vote ki poi bha ha ka por dang step phyrngap bad ha kaba sdang jong ka sngi. Katkum ka jingïoh jingtip, lai tylli ki Polling Station ki la ïoh rekod bha namar ka jingpoi ki nongthep haduh 96 percent. Kine ki 3 tylli ki Polling Station kata ka Mawmaram B ka ïoh 96.49 percent, Kharangoi ka ïoh 96.45 percent bad Nonglyngkien ka ïoh 96.38 percent”.
U Bah Kharkongor u la ïathuh ruh ka jingduna bha ki nongthep vote katkum ka jingïoh jingtip kadei na Rinli kaba long tang 73.22 percent.
Ha kaba ïadei bad ka jingsniew lane ka jingpynthud ki machine, u Bah Kharkongor u la ong ba katkum ka jingïoh jingtip kam don kano kano ka jingthud ki machine ha baroh kine 63 tylli ki jaka thep vote.
U Bah Kharokongor u la ïathuh ba ka jingkem ïa ka kyiad ka long baroh 1450 litre bad tang mynta ka sngi na ka liang ka tnad Excise ka la ïoh ban kurup haduh 1104 litre ka kyiad phareng bad kiwei ki jingdih kaba la kot sha ka T.4 lak tyngka. Nalor kane, u la ïathuh ba 60 percent jong baroh ki Polling Station la khmih bha lyngba ka Webcasting.
U CEO u pyntip ruh ba ka Tnad Excise ka Jylla kala ioh ban kurup ïa bun bah ka kyiad hapdeng ki kynta ba dang ïaid ka jingïathep vote ha Sohïong. Ïa kane ka kyaid Indian Made Foreign Liquor (IMFL) la ioh ban kurup na ka shnong Mawkohtep ha ka por 2 baje janmiet.
U Bah Kharkongor u la pyntip ruh ba jingniew ïa ki vote bad ka jingpynbna ïa u kyrtong nongjop na ka bynta ka Sohiong konstitwensi, kan long ha State Central Library in Shillong ha ka 13 tarik u Jymmang, 2023.
Haduh 5 pyrton ki CAPF kila pahara ha kane ka elekshon ha Shillong ban pynthikna ïa ka jingïaid beit ïaid ryntih. Ka Tnad Election kala pyndonkam ruh ïa ki women flying squad ha ka sien ba nyngkong eh nalor ka ka polling station tang jong ki kynthei.
Lah ban kdew ba kane ka jingjied nongmihkhmat, la don hynriew ngut ki kyrtong kiba la wan shakhmat ban ïa aireng. Kine ki long, u Bah Synshar Lyngdoh Thabah jong ka United Democratic Party (UDP), u Bah Samlin Malngiang u jong ka National People’s Party, u Bah Osborne Kharjana u jong ka Congress, u Bah Eric Kharbuki jong ka Bharatya Janata Party (BJP) bad u Bah Stoding Thabah jong ka Trinamool Congress and Sandondor Ryntathiang of Hill State People’s Democratic Party (HSPDP).
Ha kawei pat ka liang na ka liang u Kynjatshai, u la ïoh ban leit jngoh, ïa kane ka jingthep vote na ka bynta jong ka Sohiong Assembly Constituency, u la shem ba ka long kaba ïaid beit ïaid ryntih bad ki nongthep vote ka la don naduh 7.0 baje mynstep, kaba long ka por bas dang ka jingthep vote haduh ban da kut ka por. Ka jingthep vote ka la long baroh shisngi bad ka jingshit jong ka sngi kam shym la lah ban pynduh mynsiem ïa ka jingwan jong ki nongthep vote. Ha kane ka jingleit jngoh jong U Kynjatshai, la shem ruh ba ki longkmie ki la wan sha ki jaka thep vote da kaba bah ïa la ki jong ki khun.
Na ka liang u Kynjatshai u la ïoh ban ïakren bad u Presiding Officer jong ka Weilyngkut Polling Station, u la ïathuh ba ka don ka jingthud jong Voter Verifiable Paper Audit Trail ha ka 7 baje mynstep bad la wanrah da kawei pat ka machine ha ka por 8.30 mynstep bad ka jingthep bud ka la ïaid beit.
Ha kaba ïadei bad ka jingpynïaid ïa kane ka jingthep vote ha Mawpun Polling Station, ha ka por 5.30 mynstep bad leh ka ka Mock Poll bad shem ïa ka jingthud jong ka Voter Verifiable Audit Paper Trail. Hynrei, hangne ruh la lah ban weng ïa kane ka jingeh da kaba wanrah pat da kawei ka machine bad ka jingthep vote ka la ïaid beit naduh ka por 7.0 baje mynstep.
