MAWKYRWAT:
Ka myntri jong ka koit ka khiah jong ka sorkar Meghalaya ka Dr. Ampareen Lyngdoh mynta ka sngi ka la wan ban jurip ïa ka Civil Hospital Mawkyrwat bad don ka review meeting bad ki staff, doctor jong kane ka hospital ha ka jingïadonlang i Kong YR Mawlong, Additional Deputy Commissioner ka South West Khasi Hills District, i Dr. H.C Lyndem, Director, D.H .S (MI), Dr. Wanbudmi Sutnga, Medical Superintendent ka Civil Hospital Mawkyrwat, i Dr. FR Lartang, District Medical & Health Officer bad kiwei kiwei.
Haba kren sha ki nongthoh khubor ka Dr. Ampareen Lyngdoh ka la pynpaw ïa ka jingkmen ban ïohi ba wat ha i por iba lyngkot kane ka hospital ka la lah ban ai ka jingshakri kaba biang bad pura sha u paid nongshongshnong jong kane ka dong ka thaiñ. Ha kajuh ka por ka la ïaroh ba hapoh ka jingïalam jingtrei jong u Dr. W Sutnga, Medical Superintendent la lah shisha ban ïohi ïa ka jingkylla sted hapoh kane ka hospital da kaba niew ba kane ka la dei ka Model hospital. Shuh shuh, ka la pyntip ba ki don haduh kumba 79 tylli ki shnong ki bym lait kali ha kane ka dong ka thaiñ bad namarkata ka sorkar ka la sngewdei ban rah ïa ki Sub Centres lane ki Health & Wellness Centres sha kiba kum kita ki jaka na ka bynta ban ai jingshakri ïa u paidbah. Ka la ïathuh ruh ba ka sorkar ka la don jingthmu ban pyntreikam ïa ka Drone Technology na ka bynta ban rah ïa ki dawai sha ki jaka kiba shitom ban poi kali, nangta ka la ïohi ïa ka jingdonkam ban ai training ïa ki nongpynkha khun (DAIs) bad ban siew dor ïa ki.
Haba pynpaw ïa ka jingbynniaw ïa ka jingshem jingeh halor ka jingduna ka jingshim tika jong ki khyllung hapoh ka 1000 sngi jong ka jingim ka jongki ka sngew ïa ka jingdonkam ïa ka jingïatreilang jong ki kmie ki kpa jingïatreilang ryngkat ki Ashas. Namar kata ka la khot ïa ki Sengbhalang bad Seng Trei Mon Sngewbha ban ym peit tang ïa ki jingduna hynrei ban wan shakhmat ban ai ka kti kamon ka kti ka diang ban ïatreilang bad ka sorkar na ka bynta ban wanrah ïa ka koit ka khiah ha kane ka thaiñ bad ban ïakren halor ki High Risk Pregnancies, ka la pynpaw ïa ka jingdonkam ban ai pisa bad pynsted wut wut ïa ka jingpyntreikam ïa ka Blood Bank unit jong kane ka hospital. Ha kajuh ka por ka la pynpaw ïa ka jingdonkam ban donkam ban phai khmat sha ki Non Communicable Disease kiba long ki dawbah jong ka jingduh noh jong ki mynsiem kum ka High Blood Pressure, Diabetes, Cancer, Tuberculosis da kaba kyntu ïa baroh ki nongtrei ban trei shitom bad ban ai ka jingshakri kaba bha na ka bynta ban kyntiew ïa ka koit ka khiah bad ban wanrah ïa ka roi ka par ha kane ka dong ka thaiñ.
