SHILLONG:
Ka Committee ka ba la thaw da ka sorkar jylla, ban bishar halor ka jingpyntreikam ïa ka Roster System bad ka Reservation Policy, ha ka 31 tarik Jymmang hadien ka jingïalang baroh ki seng saiñpyrthei ha ka jylla ka la shim ïa ka rai ban bthah ïa baroh ki sengsaiñpyrthei ha ka jylla ba ki dei ban ïathir ïatai shwa hapoh ki seng jong ki, halor ka mat ba balei ki kwah ban pynbeit thymmai biang ïa ka Reservation policy bad aipor lai taïew ïa ki seng saiñpyrthei ban pynsngew ïa ki jingaijingmut jong kane ka Committee.
Lah ban kdew hangne ba ka Sorkar Jylla ka la thaw ïa ka “Committee’ ka ba la khlieh da ka Dr Mazel Ampareen Lyngdoh ka Myntri ka tnad aiñ, na ka bynta ban ïathir ïatai bad baroh ki seng saiñpyrthei na ka bynta ka jingpyntreikam ïa ka roster bad ka reservation policy ha ka jylla.
Ha ba kren sha kilad pathai khubor ka Myntri ka tnad Aiñ ka Dr Mazel Ampareen Lyngdoh ka la ïathuh ba hakane ka jingïalang ka la don ka jingaijingmut na baroh ki seng saiñpyrthei wat la ki don ki ba ïa hap jingmut bad don pat ki bym ïahap.
“Hapdeng ka jingïakren halor ka State Reservation policy, baroh ki sngewthuh ban pynkylla bad ban shim rai, kum ka Committee kam ym lah ban leh, hynrei na ka liang ka Committee, ka la kyrpat ïa baroh ki seng saiñ pyrthei ba ha ba ïa jingmut hap ban pynshai balei hap ban leh kumne, namar ba lada poi sha ing kashari kan ym don kano kano ka kynrum kynram ban pynjynjar ïa ka jylla hadien habud” ka la ong.
Ka la bynrap, “Don pat ki seng saiñpyrthei ki bym pat lah ban ai noh ka rai jong ki mynta mynta namar ba kin hap ban leit phai biang sha ki seng lade ban ïatai shwa ïa kane ka kam bad ban pan jingmut bad don ki seng saiñpyrthei ki ba ong ban pynïaid noh shakhmat lada ka sorkar ka pynbeit ïa ka Office Memorandum jong u bnai Jymmang 2022”.
“Halor kane ka mat ka Committee kan hap ban ïa kynduh biang, bad hadien kaei ka rai ban mih na ka ne ka Committee kan sa rah sha ka sorkar bad ka sorkar ruh kam lah ban thaw ïa kano kano ka Committee kumne kumne namar ka don kam ïa ka jingai jingmut jong ki ba bun ki ba don bynta lang bad kumta ngin hap ban rah biang baroh sha ka sorkar khnang ban ai bynta lang ïa baroh namar kane kan long ka rai ka ban sah kynmaw ba ngim pat ju poi sha ka thong”, la ong ka Chairman ka Committee.
Ka la ong shuh shuh ba kum ki dkhot ki ba don bynta lang ha kane ka Committee, ki la shim ïa ka rai ban ïatai ïathir shisien,ban wad ïa ki lad ki lynti, wat la kam jynjar ban ïoh ïa ka jingïahum ka ba long 100 % hynrei ka Committee kan wad ïa ka lynti ka ban lah ban pdiang lang da baroh .
“Ka Committee ka la bthah ruh sha ki seng Saiñpyrthei ba lada phi kdew ba lada ki ong ban weng ïa kano kano ka kyntien na ka Reservation Policy, phin hap ban pynshai balei ba donkam ban weng? Namar ngin ym lah ban shu kdew lane ong , namar ka Reservation Policy , ka dei ka ba hap hapoh ka Riti shynshar, ka aiñ”ka la ong shuh shuh.
Ka la bynrap “Ha ba ki dawa, hap ban pynshai ruh khnang ba ka Committee kan lah ban pynshai lang ïa kane sha ka sorkar bad ngim lah ban tip kaei ba ka sorkar kan shim ïa ka rai halor kane hynrei haba phi pan ïa kata ha ka jingïalang ka ba kum kane kidei ban don ka nongrim ban pynshai ba balei ki kwah ïa kata bad ka nongrim jong ki ka dei ban long katkum ka aiñ, ka jingshisha, ka riti shynshar, ka ba dei ka bynta ban pynïaid ïa ka sorkar hynrei ban shu pan kat ba ngi mon kam lah ban long”.
“Haba ka sorkar ka shimti ban rai ïa kano kano ka bynta ki hap ban bishar bha namar kam dei ka ba suk bad kumta ka Committee ka la ai por 15 sngi, ïa baroh ki seng saiñpyrthei ban aiti ïa kine ki jingai jingmut jong ki”, ka la bynrap shuh shuh.
