SHILLONG:
U Chief Executive Members (CEM) ka Khasi Hills Autonomous District Council (KHADC) u Bah Pynïaid Sing Syiem mynta ka 12 tarik u Nohprah 2023, u la pynlait paidbah bad aiti ïa ka kali kit ñiut, sha ka Hima Khyrim ha ka jingïalang kaba la long hapoh Ïingsad Smit.
Haba kren ha kane ka sngi na ka liang u CEM ka KHADC u la ong ba ka kam ram jong ka KHADC ka long ban thaw ïa ki aiñ, ban pynneh ïa ka riti hynrei mynta ka kynti ka Council ka la shim ruh ïa ka sienjam ban wanrah ïa ka khuid ka suba ha ki shnong ki thaw.
U la ong,” kum ki nongïalam ha ki shnong ki thaw ka jingeh kaba khraw tam ha ki shnong ki thaw ki long ha ka um bam um dih bad ki ñuit bad lada bakla ha ka jingpynbeit ïa kine ki jingeh kin shah weng kum ki nongïalam shnong”.
“Kumta na ka liang ka KHADC ka ïohi shai ïa kine ki jingeh kumta ka Council ka la wanrah da ka aiñ kaba la tip kum ka Solid Waste Management Act 2020 ka ba mynta ka la ïoh ruh ka jingmynjur na u Lat ka jylla”, u la bynrap.
U Bah Syiem u la ong hapoh kane ka aiñ ka Council ka la wanrah ïa shibun ki kyndon ban lah ban teh lakam ïa ka jingbret pathar ïa ki ñuit ki ñier, kane ka long kum ka jingshim ka council ïa ka nongkit khlieh ban wanrah ïa ka khuid ka suba.
Kane ka kali kit ñiut ka dei kaba la ai sngewbha lyngba ka Skhim Chief Minister Special Development Fund, ha kane ka jingïalang la ïa don ryngkat u Syiem ka Hima Khyrim u Paiem Dr Balajied Sing Syiem, ki Lyngdoh, ki Myntri ki MDC bad ki nongïalam shnong.
