SHILLONG:
U Chief Secretary jong ka Sorkar Meghalaya, u Bah D.P. Wahlang mynta ka sngi u la pynpaw ïa ka jingsngewkhia jingmut halor ka jingpynmih ïa ka platik ha pyrthei kaba kot sha ka haduh 400-million-ton shi snem shi snem namar kine ki pynjakhlia ïa ka mariang. U Bah D.P. Wahlang u la ong ruh ba ka jingeh kaba khraw ïa ka pyrthei ka ïakynduh ka long ba shiteng na kitei ki plastic ki dei kiba lah ban pyndonkam tang shisien bad dei tang 10 na ka 100 ban lah ban saiñ plastik biang.
Haba kren ha ka sngi ba pynkut ïa ka jingrakhe ïa ka World Environment Day ha State Convention Centre, u Bah D.P. Wahlang u la ïathuh ba ka jylla Meghalaya ka ïoh ïa ka nam ka burom ba ka don ka shnong kaba khuid tam Cleanest Village, hynrei, mar khongpong ïa kata, ka Meghalaya ka jah burom ba ka don ïa ki wah kiba jakhlia tam ha India. Une u heh Sorkar u la ïathuh ba ka Wah Umkhrah bad ka Wah Umshyrpi ka hap ha ka thup jong ki 45 tylli ki wah bajakhlia duh ha ri India. Une u heh Sorkar u la ïathuh ruh bad or ar jait ki um.
Kawei ka dei ka um kaba jakhlia kaba mih na ki sceptic tang bad kawei pat ka um ka dei kaba ym da jakhlia than, kum ka um kaba tuid na kaba sait ïa ki jingkhlieng bad ki um sum. U D.P. Wahlang u la ïathuh ba ka don ka lad ban pynkhuid ïa kaba kum kane ka um bad ïa kane ka um kaba la pynkhuid lah ban pyndonkam biang ïa ka. U Bah D.P. Wahlang u la ïathuh ba ka Sorkar ka angnud ban ïohi ba ba ka Wah Umkhrah bad ka Wah Umshyrpi kin long biang kiba khuid khlir khlir.
Ha kaba ïa dei bad kane, une u heh Sorkar u la ïathuh ba yn sa phiah ïa ka Shillong ha ki katto katne ki bynta bad ban buh ruh ïa ki Magistrate bad Assistant kiba ban peit ba kine ki jaka, ki long kiba lait na ka jingpynjakhlia. U Bah D.P. Wahlang u la ïathuh ruh ba ka Sorkar kan pyndonkam ïa ki bor ki bor ha kaba yn lah ban tip bad ban ïohi ïa ki nongpynjakhlia.
