SHILLONG:
Ka seng Jaiñtia Youth Federation (JYF) Bataw Unit, ha ka 19 tarik Risaw ka la leit ban buh jingthoh sha ka ophis jong u District Medical and Health Officer (DMHO), East Jaiñtia Hills District na ka bynta ban dawa ban pyndap sa kawei ka post Doctor bad kawei ka post Pharmacist na ka bynta ka jingbit jingbiang jong ka PHC kaba don ha ka shnong Bataw.
Katkum ka jingthoh ba la phah sha u DMHO, East Jaiñtia; na ka liang ka Seng ka la pynpaw ba kitei ki post ba la kdew haneng ki dang thylli haduh mynta. Halor kane ka JYF Bataw Unit ka la lap hadien ka jingleit jurip ïa katei ka PHC ha ka 13 tarik, mynta u bnai.
Ha ka jingjurip jong ka seng, ka lap ba kumba long haduh mynta kane ka jaka ai jingsumar ka dang don tang kawei ka Doctor bad kawei ka Pharmacist. Kane ka jingduna nongtrei ka la pyndkoh shikatdei eh ïa ka jingtreikam ha kane ka PHC bad ka la ktah jur ïa ki nongshong shnong ka thaiñ kiba shaniah ban ïoh jingsumar, kumjuh ruh ki dawai dashin na kane ka jaka sumar jong ka sorkar.
Kumta ka JYF Bataw Unit ka la buh ka jingkyrpad kaba jur ïa u DMHO ba u dei ban peit ïa kane ka PHC ba un sngewbha ban shimkhia bad ban ïarap kloi kloi ban pynïoh Doctor bad Pharmacist hapoh Bataw PHC khnang ba kan long ka jingmyntoi kaba khraw ïa ki nongshong shnong bad ruh ban pyllait ïa ki nongshong shnong na ki jingjia ba sngewsih.
