NONGSTOIN:
Kawei ka jingkieng dieng kaba don ha ka shnong Tiehsaw kala kdiah na ki bynta ba hapdeng hadien ba kawei ka trok dumper kaba la kit palat pud kala ïaid lyngba katei ka jingkieng kat haduh ba ka jingkieng kam lah kyrshan shuh ïa ka jingkhia.
Katei ka jingjia kala jia hynne ka step ha kapor kumba 11 baje eiei tangba ym shym don kano kano ka jingmynsaw briew ba katei ka jingjia hynrei kala wanrah pat ïa ka jingdheng kali bad ktah ïa ka leit ka wan ki paidbah ba ïaid lyngba katei ka jingkieng. Katei ka trok dumper kadei jong ka kompani kaba dang pyntrei ïa ka surok Nongstoiñ-Rambrai bad kala kit ïa ka khyndew da ka jingthmu ban leit theh ha kawei ka jaka trei jingkieng jong katei ka kompani.
Na ka liang jong katei ka kompani ka dang pyrshang ban tan noh ïa katei ka trok kaba la sahkut bad ban maramot pat ïa ka jingkieng kaba la kdiah bad kat haduh ban da dep maramot ki kali ki hap ban pyndonkam na kawei pat ka surok ban ïaid lyngba.
