NONGPOH:
Katto katne ngut ki nongshong shnong ka shnong Pahamrioh, ha ka 17 tarik Lber ki la leit ban jurip ïa ki jaka ba sma, kaba la mih na ka jingpyntuid jakhlia na ki Dhaba kiba don ha kane ka shnong.
U Deputy Commissioner ka Ri Bhoi, u la phah da u Magistrate ban leit jurip ïa katei ka jaka, khnang ban lap ïa ka jingshisha halor kane ka jingsma kaba la mih na ki Dhaba kiba don ha kane ka shnong.
Hashwa kane, ki nongshong shnong ka shnong Pahamrioh, ki la phah da ka jingthoh sha u Deputy Commissioner ka Ri Bhoi, bad ki la kyntu ruh ïa u ba u dei ban leh eiei ne ban leit jurip ïa ki Dhaba kiba don ha kane ka shnong, ha kaba ki la ujor ïa ar tylli ki Dhaba, kita ka Highway Dhaba-2 bad ka Sardarji Dhaba.
Haba kren sha ki lad pathai khubor, u Bah E Tyngsang u la ong ba ki paidbah kiba shong hajan ki jaka pyntuid jakhlia jong kine ki Dhaba, ki la syllang eh ban ring mynsiem namar ka jingsma, kaba lah ban ktah wat ïa ka koit ka khiah ki paidbah.
U la ong ruh ba ki trai jong kine ki Dhaba, ki dei ban pynïaid ïa ki jakhlia ha ka rukom kaban ym wanrah ïa ka jingsma bad u la bynrap ruh ba lada kim lah ban pynduh ïa ka jingsma, na ka liang kiba la leit jurip ki dei ban khang shwa ïa kine ki Dhaba.
