NONGSTOIÑ:
Namar ka jingkiew kynsan ka jingshit jong ka suiñ bneng ha kine ki sngi kaba lah ruh ban ktah ïa ki koit ka khiah jong ki paidbah, na ka liang jong ka Khasi Student Union, West Khasi Hills District ka la phah da ka dorkhas sha ka Sub- Divisional School Education Officer (SDSEO) ka Nongstoin ban phah khang shwa ïa baroh ki skul ban phah ieng laiñ ïa ki khynnah shwa ban long skul ne ka school Assembly khnang ban ïada na kino kino ki jingshah ktah ha ki bor mariang.
U Bah Johnfisher Nongsiang, President ka KSU West Khasi Hills District Unit u la ong ba ngi la ioh shibun ki jingujor na ki kmie ki kpa kiba sngew khuslai na ka bynta la ki jong ki khun namar ka jinglong shit kyr-ang palat jong ka suiñ bneng kaba la lam ruh sha ka jingioh pang.
U la ïathuh ruh ba ha kine ki sngi ki la don ruh ki khynnah skul kiba la kyllon katba dang ieng Assembly bad ki don ruh kiba la iohpang namar ka jingshit palat jong ka suin bneng.
Namarkata, na ka liang jong ka seng ka kyntu jur ïa ka SDSEO ba kan sngewbha ban shimkhia ban phah sangeh shwa ïa ka jingïeng Assembly ha ki skul namar kane ka lah ban ktah ïa ka koit ka khiah jong ki khynnah skul.
