SHILLONG:
U Symbud Myntri Rangbah ka jylla, u Bah Prestone Tynsong u la ïathuh ba ka sorkar ka la dep ban phah ktien sha ki nongïalam ka Harijan Panchayat Committee (HPC) ba ka kwah ban ïakynduh ïa ki ha kine ki sngi ban wan.
Haba kren bad ki lad pathai khubor u Bah Prestone u la ong ba ka sorkar ka la dep ban bthah ïa u Commissioner Secretary ban phah khot ïa ki nongïalam ka Harijan Panchayat Committee ban don ka jingïakren bad ki ha kine ki sngi ban wan.
“Ha ka jingïalang kaba la long shwa ka jinglehniam Puja, ngi la pynsngew ïa ka jingtyrwa jong ka sorkar hynrei kila pan por na ngi ban ïasyllok shwa bad ka sorkar ka la kren shai ïa ki ba tang shu dep ïasyllok sa wan sha ka sorkar hynrei ngam sngewthuh ba haduh mynta ki Harijan kim pat lah ban pyntip eiei”, u la ong.
U la ong ba namar ba ki sngap jar jar na ka liang ka sorkar ka la phah ktien ba kin wan ban ïakynduh bad ka sorkar ha kine ki sngi ban wan.
“Ka ïing Kashari ka don bad ka sorkar ka la dep ban aiti ïa ka jingpynshai (affidavit) sha ka ïing kashari ba ka sorkar kan ym shu bret ïa ki kumto, hynrei ka la ai ka jingtyrwa ïa ka jaka ban pynkynriah ïa ki hynrei haduh mynta kim pat jubab”, u la bynrap.
