SHILLONG:
Ka Voice of the People Party (VPP), mynta ka 15 tarik Jylliew ka la leit ban buh da ka jingthoh ha khmat jong u Symbud Myntri Rangbah, u Bah Prestone Tynsong uba peit ïa ka tnad kam pohiing, ban kyntu ïa ka sorkar ba kan shim khia bad peit pyrman bha halor ka jingwantuid ki phetwir sha ka jylla namar ka jinglong jingman ha ka jylla Manipur.
Haba kren bad ki nongthoh khubor hadien ba lahdep ban leit aiti ïa ka jingthoh ha u Symbud Myntri Rangbah, u General Secretary ka VPP, u Dr Ricky AJ Syngkong u la ong ba ka seng ka sngewkhia halor ka jinglong jingman ha Manipur, khamtam eh haba ki tip ba ki don bun ngut ki phetwir kiba wan na ka jylla Manipur ban wan rieh tngen ha ka jylla Meghalaya.
“Ngi la leit buh da ka jingthoh ha khmat u myntri ka tnad kam pohiing bad kyrpad ïa u ba u dei ban buh jingthoh bha ïa baroh ki phetwir kiba wan na Manipur sha ka jylla jong ngi, khnang ba shisien ba ka jinglong jingman ha Manipur ka la long biang kumba ju long bad shongsuk shongsaiñ, kine ki briew kin lah ban leit phai biang sha ka jylla jong ki”, la ong u Dr Ricky.
Na ka liang u Dr Ricky u la ai ruh ka jingïaroh ïa ka sorkar kaba la ai jingïarap, kum ka jingsngew synei para briew ïa kine ki para riewlum kiba mad ïa ka jingshah ktah ha Manipur.
“Ngi sngew nguh ruh ïa ka sorkar halor ka kam ba ka la leh katkum ka jingsngew synei para briew ban shah ïa kine ki para riewlum kiba la shah ktah halor ka jinglong jingman ha Manipur hynrei ha kajuh ka por ruh ngi sngew ba na ka bynta hi ka jingbha jong ka jylla bad ki briew jong ngi ba kine ki phetwir kiba wan sha ka jylla jong ngi ba kin leit phai noh biang sha Manipur shisien ba ka jinglong jingman ka la wan phai biang sha ka jingsuk”, la ong shuh shuh u Dr Ricky.
Lah ban kdew hangne ba kane ka jingjia ha Manipur ka don ka tynrai kaba la sdang naduh 10 snem mynshwa hadien ba ka jaitbynriew Meitei ka la dawa ban ïoh noh ka jingithuh kum ki jaitbynriew riewlum (ST). Hynrei kaba la nangaiding ïa kane ka dei hadien ka hukum jong ka High Court ka Manipur kaba la bthah ïa ka sorkar ba kan ai jingmut ïa ka Union Tribal Affairs Ministry shwa ka 29 tarik u Jymmang, ban ai jingithuh noh kum ka jaitbynriew riewlum ïa ki Meitei.
Ka ka hukum ka High Court ka la wanrah ïa ka jingpyrshah jong ki hajar ngut ki briew kiba la ïa mih sha madan ha ka jingkhot jong ka seng ki khynnah pule ha baroh 10 tylli ki District kiba don ha Manipur ban pyrshah ïa ka jingdawa ban kynthup ïa ki jaitbynriew Meitei ha ka thup ST.
Ki Meitei ki don palat ïa ka 53 percent na ka jingdon briew ha Manipur bad ki dei kiba don hapdeng jong ka sor ha Manipur ha ki bynta ba long them (valley) katba ki Naga bad ki Kuki kiba don kumba 40 percent ki dei kiba im ha ki jaka lum kiba ker sawdong ïa kane ka them bah ba im ki Meitei.
Kane ka jingïakhih ka la wanrah ïa ka jingïap jong palat 115 ngut ki briew bad palat ïa ka 40,000 ngut ki dei kiba la hap ban mih na la ki jong ki iing ki sem jong ki namar ka jingïaum snam kaba la sdang ha ka 3 tarik u Jymmang.
