NONGSTOIÑ:
Wat hapdeng ka jingpyrshah na kiba bun halor ka jingpynkynriah ïa ki tiar jong ka Maternity & Child Hospital na Nongstoiñ sha Mawkyrwat, mynta ka sngi ka 1 tarik Jylliew ruh ka la don biang ka jingthmu ban wan kit ïa ki tiar ba dang sah na katei ka MCH kaba la pynlong ïa ki Sengbhalang ka thaiñ ban leit pynsangeh ïa katei ka jingthmu.
Ïa kane la sakhi ruh ha ka sngi Palei ha kaba ki kynhun ki Sengbhalang na Nongstoiñ ba kynthup ïa ki seng UHM, WKSU, WFF, HANM, MYF bad KSU ha ryngkat ki seng longkmie ki la ïapoi ha ka MCH ha Nongstoiñ bad phah sangeh noh ïa katei ka jingthmu ban kit biang ïa ki tiar na katei ka Hospital.
Hadien kane ka jingpynsangeh ki kynhun Sengbhalang la wanpoi ruh ka DM&HO WKHD ka Dr. S.A Lyngdoh ha kaba ki sengbhalang ki la ïoh ban ïakren bad ka da kaba dawa ruh ba kadei ban phah sangeh ban kit ïa ki tiar na katei ka Hospital.
Haba kren sha ki lad pathai khubor ka Dr. S.A Lyngdoh ka la ïathuh ba ka jingpynkit ïa kitei ki tiar kadei ka jingwan ka hukum na ki bor ba halor bad ka la ïathuh shai ruh ba kitei ki tiar ba la dep kit kidei hi kiba la mang na ka bynta ka MCH ha Nongstoiñ bad lehse na ka daw jong ka jingbym pat biang ki nongtrei bad ka jingbym pat plie ïa ka MCH la pynkit noh ïa ki tiar sha Mawkyrwat.
Ha kaba ïadei bad ka jingwan pynsangeh ki kynhun Sengbhalang na ka liang jong ka DM&HO ka la ong ba kan pynsangeh shwa bad kan sa phah ruh ïa ka jingpyntip sha ki bor ba halor.
