SHILLONG:
U CEM ka KHADC u Bah Pyniaid Sing Syiem u la ïathuh ba ha ka dorbar tlang ka Executive Committee (EC) kan wanrah ïa ka Khasi Jaintia Autonomous District Fishery Amendment Bill 2023, bad kane ka long ban pynkup bor ïa ki dorbar shnong na ka bynta ban pynneh ïa ki wah, bad ki um bam um dih kham tam ïa ki doh um.
Haba kren sha kilad pathai khubor u Bah Syiem u la ong ba, “kane ka dei ka PrincipalAct jong u snem 1954 hapoh ka KHADC, kaba ai bor ïa ki shnong ban ïatrei lang bad ka Council ban pynneh pynsah ïa ki wah, ki um bam um dih bad khamtam ïa ki doh um, kane ka ACT 1954 ka ai bor ban khang lad ïa ki briew ban pynïap ïa ki doh um doh wah”.
U la bynrap, “haba wanrah ïa kane ka Bill kan pynjanai shuh shuh ïa ka jingpyntreikam jong ka EC lyngba ki Policy jong ka hapoh kane ka Bill bad kane yn lah ban pynurlong tad yn da la ïoh jingmynjur na u Lat ka jylla”.
U la ong shuh shuh, “kane ka Bill kan long ka Bill ka ban wanrah ïa ki jingtreikam kaba janai ban pynneh ïa ka khuid ka suba ha ka mariang”.
