SHILLONG:
U Symbud Myntri Rangbah ka jylla u Bah Prestone Tynsong u la pyntip ba shen ka tnad PWD kan sa sdang noh ban shna ïa ka surok na Mawlai By-pass sha Umroi Airport Umroi ban lah ban pynkynriah noh ïa ka jingïaid ki kali na ka jingkieng Umïam kaba la don hapdeng ka jingma.
U Bah Prestone ha ka 19 tarik Nohprah u la buh mawnongrim na ka bynta ki ar tylli ki surok ha ka shnong Mawlai kaba kynthup ïa ka surok ka ban pynïasoh na Mawlai Motsyiar sha Mawlai Umjaiur bad na Riat Medi sha Mawlai Nongpdeng ha ka jingïadon ryngkat u MDC ka Mawlai konstitwensi u Bah Teiborlang Pathaw, ki rangbah shnong bad kiwei kiwei.
Haba kren ha kane ka sngi, u Bah Prestone u la ïathuh ba ka sorkar mynta ka la dep ban ïoh ïa ka mang pisa ka ba kot sha ka T.75 klur ban pyntrei ïa ka VIP road na Mawlai Bypass sha Umroi Airport ka ba la ïoh lyngba ka CRF bad ka DONER Ministry.
“Kan don ka pisa ba la ïoh bad khot tender na Mawlai By pass sha Airport Umroi T.50 klur bad T.25 klur CRF bad DONER ministry T. 75 klur ban pyntreikam ka VIP road ngi la pynkhreh ban phah ïaid ïa ka jingkieng na Dam ngin shna ïa ka VIP road kan long ka jingkyrkhuh ka ba khraw”, u la ong.
U Bah Prestone u la ai ruh ka jingïaroh ïa u MLA barim ka Mawlai konstitwensi u Bah Founder Strong Cajee, u ba la pruid lynti ban ïoh ïa ka surok Mawlai ByPass , namar kane ka surok ka la pynlait ïa ka jingdheng kali.
U la ïathuh ruh ba shen ka sorkar kan sa sdang noh ban shna ïa ka Western Bypass, kaba mynta ka jingïakren ka la poi ha ka wad ka ba khadduh , bad shen kin sa ïoh ïa ka mang pisa, ban shna ïa kane ka surok bad mynta ka la ïaid ka jingsiew ïa ka bai jaka.
U Bah Prestone u la ong ruh halor ka jingsniew ka surok ha Mawlai ha kine ki bnai ba la dei ka dei namar ba ka PWD ka kwah ban pynbha ïa ka surok hynrei ha ka juh ka por ka PHE ka kwah ban ai um tyngkhuh kine ar tylli ki tnad bam pumpum shipor ki nongMawlai ,hynrei ngin pyndep kloi noh ïa kine ki surok.
“U Bah Teiborlang Pathaw u ju wan sha nga arsien shitaiew, tang shu ïohi kyrteng jong u nga la sngewthait lupa namar u thlia ka bym long ïakren shuh ha phone lei ynnai ïa kren haduh nga ong nga king ka jabieng bad na ka jingwantur u MDC sha Secretariat ym tang ban kynduh ïa nga hynrei u ju ap ïa u Myntri rangbah ruh da ki 2 lane 3 kynta ban ïa kren halor ka roi ka par ha Mawlai”, u la ong.
“Kane ka surok kan dei ka jingai sngewbha Khristmas ïa phi baroh bad ha kine ki kyndiat taiew ngin sdang noh ban long ban shna bad kan long ka jingkyrkhuh ïa ki nongshnong shnong ha Mawlai bad yn da la dep siang rong ïa ka surok ngin siang sa u tite ha ki jaka ïaid kjat ha Mawlai” u la bynrap.
“Don ki MLA, ki MDC kiba kwah ïa ka burom hynrei bishar ki paidbah ka wan naei mano baleh ha ki Social Media shu ïa kam ïa kaei kaei hynrei ban ïa kam than kam bha namar ba khadduh myntoi u paidbah u ba ïoh ïa kane ka jingïarap”, u la ong.
“Na ka liang ka Sorkar ka kwah ïa ka Sor Shillong ba kan phuh kan phieng ha ki lynti ki synkien bad ban pynphuh pynphieng ïa ki lynti synkien ka sorkar ka la dep ban bei pisa haduh T.65 klur ha baroh ka sor Shillong hynrei namar ba ka Shillong ka dei kaba heh ym pat ïohi ïa ki kam bad ka sorkar kan dang bun ba ngin hap pynlut ban pynitynnad ïa ka Shillong baroh kawei”, u la bynrap.
