SHILLONG:
Katto katne kynta hadien ba ki nongshong shnong jong ka Umsyiem kaba don hajan Dawki ki la kynnoh ba ki shipai Border Security Force (BSF) ki la pyndonkam bakla ïa ka bor ba la pynkup ha ki, na ka liang ki bor shipai ki la pynshai ha ka 25 tarik Jylliew ha kaba ki la kyntait ïa kane bad ki la ong ba katto katne ki briew ïa kiba la suba ba ki dei ki nongshalan beaiñ ki la kawang maw ïa ki shipai 4th Battalion kiba dang don hapdeng ka kam ha Umsyiem hadien ba ki shipai ki la lap ïa ka jingthmu jong ki riewbymman ha ka surok Dawki-Pynursla kaba don ha marjan jong ka khappud jong ka ri Bangladesh.
Katkum ka jingïathuh ki shipai BSF, hadien ka jingkawang maw ïa ki shipai, ki riew bymman ki la phet krad bad ynda haba la tohkit ïa ka jaka, la lap da ka song jong ki jaiñ saree kiba shongdor T 50 hajar tyngka.
“Ha kajuh ka sngi, ka BSF ka la khanglad ïa ka jingthmu shalan beaiñ ha kaba ki la ïoh bat ki jaiñ ba shongdor T 2 lak 21 hajar tyngka na kajuh ka jaka khappud,” la ïathuh ki shipai BSF.
Ki la bynrap shuh shuh ba hadien katto katne por, ki riewbymman ki la lum hajan bad rung shapoh ka ktem shong ki shipai BSF bad ki la sdang ban ther maw bad bilor beer ba la thylli ïa ki kynhun shipai BSF. “U Post commander u la pyrshang ban pynjai-jai ïa ka kynhun ki riew bymman hynrei kim shym la sangeh ban kawang maw bad bilor thylli,” la pynpaw ki shipai.
La ïoh jingtip ruh ba ar ngut ki shipai BSF ki la mynsaw. “Haba ngi sngewthuh ba ka ap jingma ïa ka jingim bad ki jingdon jingem, ki shipai BSF ki la pyllait noh da ka ktang suloi saw sien sha suiñ. La pyntip ïa u Station House Officer ka Pynursla Police Station bad kumta hi la wan sa ki pulit ha kane ka jaka ha kaba la lah ban tehlakam ïa ka jingkulmar. Ym shym la don ka jingktah ïa ki riewpaidbah na ka jingsiat suloi ki shipai BSF,” ki la ïathuh.
Ha shwa kane, hynne ka step la ïoh jingtip ba ha ka miet jong ka 25 tarik Jylliew katto katne ki nongshong shnong ka Umsyiem hajan Dawki ki la shah pynmynsaw hadien ba ki la shah thombor ha ki shipai Border Security Force (BSF) kiba la shongshit khawiang, kaba la pynlong pat ïa ki samla kane ka thaiñ ban bitar bad ban kawang maw ïa ki jaka sah ki shipai kaba don ha Umsyiem haduh ba la pynlong pat ïa ki shipai ban siat suloi sha suiñ khang ban pynpra noh ïa u paidbhur uba la lum ha katei ka jaka.
Na ka liang ki shipai BSF ki la ïathuh ba ka la don kajuh ka jait jingjia ha ka 5 tarik Jylliew ha kajuh hi ka jaka ha kaba ki shipai ki la ïoh bat ïa ki jaiñ ba shongdor T 1lak tyngka bad ha kato ka por, ki riew bymman ki la kawang maw ïa ki kynhun shipai haduh ba uwei na ki shipai u la mynsaw ka khlieh.
“Ka thaiñ Umsyiem ka dei ka jaka ba jur bha ka jingshalan be-aiñ ha kaba ju don ka jingshalan doh, shalan jaiñ, shalan jingtah pynbhabriew bad kiwei kiwei ki mar sha Bangladesh bad ki bun bha ki dalal ha kane ka jaka kiba ïaleh ban wanrah ka jingjai-jai bad shongsuk ha khappud tang na bynta ka jingtoi shimet jong ki,” la pyntip ki shipai BSF.
