SHILLONG:
Ki lai tylli ki Autonomous District Council ka ba kynthup ïa ka Khasi Hills Autonomous District Council (KHADC) ka Jaiñtia Hills Autonomous District Council (JHADC) bad ka Garo Hills Autonomous District Council (GHADC), ki la pynkhreh ban pynpoi ka khubor sha ka Sorkar Pdeng ba ka dei ban pynlait ïa ka jingpyntreikam ïa ka Uniform Civil Code (UCC) ha ki jaka kiba treikam ka Khyrnit ba Hynriew (Sixth Schedule) jong ka Riti synshar ka Ri India.
Mynta ka sngi ki nongïalam jong ki lai tylli ki District Council, da ka jingmih khmat ki Chief Executive Member (CEM) jong ki District Council ki la pynlong ïa ka jingïalang ban ïatai halor kane ka bynta ha Conference Hall ka KHADC.
Lah ban kdew hangne ba ka Uniform Civil Code (UCC) ka dei ka aiñ ka ba kwah ban wanrah tang ka wei ka aiñ ha ka Ri India baroh kawei, ka ban treikam ïa baroh ki kynhun niam, kata ha ka ïathoh shongkurim, ïa pyllait sanshyieng, ka jinghiar pateng bad ka jingtingkhun, kane ka Code ka long hapoh ka Article 44 jong ka Riti synshar.
Ha ba kren sha ki ladpathai khubor, u Chief Excutive Member ka KHADC u Bah Titosstarwell Chyne, u la ïathuh ba ka jingïalang ba la pynlong mynta ka sngi jong ki laitylli ki Autonomous District Council, ka long ban ïakren halor ka jingthmu ka sorkar pdeng ban wanrah ïa ka Bill Uniform Civil Code (UCC).
“Ka UCC, kan ktah jur ïa ka jingtreikam ki Autonomous District Council khamtam ïa ki riti dustur bad ïa ka jaitbynriew baroh kawei kumta ngi la shim ka rai ba ngin pdiang da ka Resolution ka ban pynpaw ïa ka jingpyrshah ïa ka jingthmu ban pyntreikam ïa ka UCC ha ki jaka ba treikam ka Khyrnit ba Hynriew”, u la ong.
“Ïa kane ka resolution ngin sa pdiang shen ha ki dorbar kyrpang jong ki Council ha u bnai ban wan, ban pynsangeh ïa ka jingpyntreikam ïa ka UCC ha ki jaka ba treikam ka Khyrnit ba Hynriew jong ka Riti Synshar”, u la bynrap.
U Bah Titos u la ong ruh “Ynda ki ADC ki la dep ban pdiang ïa ka resolution, ka sorkar jylla ruh kan hap ban kyrshan lang ïa kane ka jingtywa jong ngi”. U la bynrap “Kumba ïa ka jingpyntreikam ïa ka Citizenship Amendment Act la pynlait ïa ka na ki jaka ba don ka Khyrnit ba Hynriew kumta ïa ka UCC ruh ki dei ban pynlait na ki jaka ba don ka Khyrnit ba Hynriew”.
