SHILLONG:
Ka seng treimon sngewbha na Shillong kaba trei na bynta ka bha ka miat bad ban ai jingïada ïa ki mrad, ka Humans United for Animals and Nature (HUFAN), ha ryngkat ka jingïatreilang bad ka Shillong Municipal Board (SMB) lyngba ka Animal Husbandry and Veterinary ka la pynlong ïa ka Vaccination camp ha ka 12 tarik Jylliew 2023.
La pynlong ïa kane ka prokram ai dawai tika ïa ki mrad ha madan Ïewrynghep naduh ka por 9 baje mynstep haduh 2 baje janmiet.
Ha kane ka sngi la sakhi ïa ki riew ieid mrad ba ki wan ïalam ïa ki jingri jong ki bad kumjuh ïa ki ksew ki bym don trai sha kane ka jaka khnang ban ïoh ïa u dawai tika ai jingïada na ka jingpang rabbies.
Kane ka prokram ai tika sha ki mrad ka long kawei na ki sienjam ban ïada ïa ki na u khñiang jingpang u ba shyrkhei u bym don dawai satia lada kem ïa kane ka jingpang.
Ka jingthmu jong kane ka camp ka long ban pynduhjait ïa ka jingpang rabbies na ki mrad ba im ha surok. Kane ka jingpang ka long kaba shyrkhei bad ka bym don dawai ban sumar. Kumta khnang ban pynlait na kum kane ka khñiang jingpang, ki pyrshang ban pynduh jait da kaba pynlong ïa ka vaccination camp khnang ba ki mrad ki ba im ha ki surok kin ïoh ïa ka lad ai jingïada lyngba ka dawai kaban pynkiar ïaki ban kem ïa une u khñiang jingpang.
Ka seng HUFAN ka trei da ka mynsiem ban ai jingïada ïa ki mrad ki bym don trai lane kiba im ha surok. Na ka liang u President ka seng HUFAN, u kyntu ïa ki paidbah ba kim dei ban i-beiñ lane lehbeiñ ïaki mrad ki bym don trai bad ki bym don ïing don sem hynrei ki ba im ha surok, bad u kyntu ruh ban ai ka jingieid bad jingïada ïa ki mrad kiba im ym tang ha ïing hynrei ha surok ruh kumjuh.
