SHILLONG:
Ka Laban Bengalee Boys’ Higher Secondary School, Shillong sa shisien pat ka la pynpaw ïa ka jingtrei shitom jong ka da kaba pynmih ïa ki khynnah kiba bat ïaka kyrdan ba hakhlieh duh ha baroh ar ki stream, kata ha ka Science bad Commerce jong ka Higher Secondary School Leaving Certificate (HSSLC) ba la pynlong da ka Meghalaya Board of School Education (MBoSE).
U Rishab Purkayastha jong ka Laban Bengalee Boys’ Hr. Sec. School u la bat ïa ka kyrdan ba hakhlieh duh ha ka HSSLC Commerce stream da kaba ïoh haduh 484 mark. Ïa ka kyrdan ba ar pat la bat da u Akshat Poddar jong ka St. Anthony’s Hr. Sec. School da 478 mark bad kumjuh ruh ïa ka kyrdan ba lai la bat da ki ar ngut ki khynnah jong ka St. Anthony’s Hr. Sec. School, kata ka Satakshi Das bad ka Sneha Paul kiba ïoh mar 463 mark.
Ha ka Science stream ruh, ka Laban Bengalee Boys’ Higher Secondary School ka la ïohbat ïa ka kyrdan ba hakhlieh duh, lyngba u Arnab Dutta uba la ïoh haduh 483 mark bad ïa ka kyrdan ba ar pat la bat da ka Steffi Niza Snaitang jong ka St. Edmund’s Hr. Sec. School da 477 mark bad ka Eshita Bhattacharjee jong ka St Anthony’s Hr. Sec. School ka la wan ha ka kyrdan ba lai da 469 mark.
Kumjuh ruh ïa ka kyrdan ba saw ha ka Science bad Commerce la bat biang da ka Laban Bengalee Boys’ HS School, ha kaba u Subam Das u la bat ïa ka kyrdan ba saw ha ka Science stream, katba u Akshat Das u la bat ïa ka kyrdan ba saw ha ka Commerce stream.
Ha ka Commerce stream, ki don baroh 79.31 percent kiba pass bad ka don ka jinghiar haba ïanujor bad u snem ba lahdep ha kaba ki don 83.63 percent, katba ha ka Science stream pat, ka don ka jingkiew jong kiba pass, kiba don 78.84 percent haba ïanujor bad 71.62 percent jong u snem 2022.
