SHILLONG:
Ka ïingbishar Supreme Court, ka la bthah ïa ka ïingbishar High Court ha ka jylla Meghalaya ban bishar biang halor ka jingkyrpad ban phah tohkit ha ka CBI halor ka jingïap jong u officer in-charge barim ka Patharkhmah outpost u Bah P.J Marbaniang.
Lah ban kdew hangne ba ka jingïap jong u Bah P J Marbaniang, ka la jia hadien ba ka la don ka jingïoh kurup ïa ki 32 tylli ki trok kit dewïong beaiñ ha ka 24 tarik u Kyllalyngkot 2015. La lap ïa u Bah Marbaniang ba u la khlad bad lap ïa ka dien mynsaw kuli na ki bynta jong ka khlieh ha ka jaka sah jong u ha Patharkhmah.
Na ka liang ka National Green Tribunal ka la khang ïa ka jingtih bad khaïi dewïong ha ka jylla Meghalaya ha u bnai Ïaïong 2014.
Lyngba ka jingujor ka kmie jong une u pulit ophisar sha ka ïingbishar High Court jong ka jylla Meghalaya na ka bynta ban thung ïa ka jingtohkit CBI, ka Sorkar jylla ka la thung da ka jingtohkit kyrpang ka Special Investigation Team (SIT) ka ba la khlieh da u city SP ha kito ki por u Bah Vivek Syiem.
Katkum ka jinglap ha ka jingtohkit jong ka SIT, la ong ba ka dei ka case ba la bthat jubor ïa la ka jingim, bad la kem ruh ïa ki katto katne ngut ki briew kynthup ïa ki ophisar sorkar ki ba la kynnoh ba ki pynbor ïa u ban shim ïa la ka jingim.
Hadien kane ka ïingbishar High Court ka la weng noh ïa ka ne ka jingujor halor ka nongrim ba ka SIT ka la dep ban register ïa ka chargesheet.
Hynrei na ka jingbym hun ïa ka jingtohkit ka SIT bad ka jingbymlah ban pdiang ba u Bah Marbaniang un bthat hi ïa la ka jingim kumba la kam da ki pulit, ka Kmie jong u Bah Marbaniang ka la ujor sha ka ïingbishar Supreme Court na ka bynta ban dawa da ka jingthokit CBI, ka ba la sahteng.
Na ka liang ki nongbishar, kiba bishar ïa kane ka mokutduma ha ka ïingbishar Supreme Court, ki la shong bishar ïa kane ha ka sngi nyngkong bad ki la bthah ïa ka ïingbishar High Court jong ka jylla Meghalaya ba kin shong bishar biang ïa kane ka jingkyrpad. “Ka ïingbishar Supreme Court ka kwah ïa ka ïingbishar High Court ban bishar biang ïa ka ne ka jingkyrpad sa shisien”.
