SHILLONG:
U Chief Executive Member (CEM) jong ka Khasi Hills Autonomous District Council (KHADC), u Bah Titosstarwell Chyne, ha ka 21 tarik Ïaïong u la ther tyngeh ïa ki briew kiba la sngew pyrshah halor ka jingkhynra trading laisen ka District Council, da kaba buh jingkylli ba ki kwah ban ïada ïano?
Lah ban kdew hangne ba u CEM ka KHADC, ha ryngkat ki nongtrei jong ka, hynnin ka sngi ka 20 tarik u Ïaïong, ki la hiar sha ki bynta ka Ïewduh ban khynra ïa ka trading laisen na ki barjylla ki ba leh ïa ka kam khaïi ha ka jaka ba hap hapoh ka District Council. Hynrei hapdeng kane ka jingkhynra la don u trai ka Kimlee Building, u Paul Leong bad kumjuh ka Meghalaya Greater Shillong Progressive Hawker and Street Vendors Association kiba la pynpaw ïa ka jingpyrshah.
Haba ïadei bad ka jingpyrshah u Paul Leong , u Bah Titos u la ïathuh ba haba ki la rung hapoh ka Kimlee Building ki la lap ba don ki dukam ki ba dang thymmai bad lap ruh ba ki ba shong ha kane ka building kim don ïa ka trading laisen, “Kumta ngi la phah khang ïa ki bad mih noh na kane ka jaka hynrei hadien katto katne por, la wan ïathuh ïa nga ba u trai kato ka building u la kynhiet ïa ki nongtrei ka Council, byrngem byrsit bad kam ba u don ïa ka court order, ka ba ngam tip ka ba kumno kata ka order, kumta nga la ong ban wan ïa kynduh mynta ka sngi 1 baje hynrei u khlem wan bad phah da uwei u briew, bad ong ba u la donkam kyrkieh sha Guwahati”.
“Halor ka ne ka Court Order ba la kam da u Paul Leong, nga kwah ban pynshai ba ka dei ka court order kaba naduh u snem 2014, ha ka ba ïadei bad ki nongshong dukan ha kane ka building kane ka Court Order ka kren shai ba kane ka building ka hap hapoh ka jaka jong ka KHADC”, u la ong.
“Katkum kane ka Court Order, ka kdew ruh ba u donhok ban ai wai ïa uno uno u briew ruh kynthup ïa u bar jylla, hynrei ki dei pat ban pyndep ïa ka kyndon jong ka Khasi Hills Trading by Non- Tribal Regulation Act 1954, bad lada ki ba shongwai ki la dep ban apply ïa ka trading laisen, ngi dei ban pyndep sha ki hapoh shibnai, kata ka dei naduh u 2014”, u la bynrap.
U la ong shuh shuh “Naduh u snem 2014, lada ki apply ki la dei ban ïoh naduh uto u snem lehse ki ba la ïoh ruh kim shong dukan shuh, ïoh la wan shong dukan da kiwei. Katkum kane ka Court Order ka la pynshai ba uno uno u ba leh ïa ka kam khaïi hapoh u pud u sam ka District Council u dei ban ïoh ïa ka laisen, tang kane nga kwah ban pynshai sha u”.
U Bah Titosstarwell Chyne u la kdew ruh ba ka jinghiar jong ki ban khynra laisen ha ka sngi Palei ha ki bynta ka Ïewduh ka long ïa ki bar jylla ki bym don ïa ka trading laisen.
“Hynrei ka ba lyngngoh ka long ka jingïoh ïa ka shithi na Meghalaya Greater Shillong Progressive Hawker and Street Vendors Association, ka ba la pynpaw ïa ka jingpyrshah bad ïa kane ka shithi la soi da ka Kong Shani Thabah bad ka Kong Biolin Pyrtuh, ki ba la kam ba ka District Council ka la pynkheiñ ïa ka Court Order”.
“Nga kwah ban pynshai hangne ba ngi khlem leit ban kyndang ïa ki ba shong madan hynrei ngi leit khynra laisen ïa baroh ki barjylla ki bym don laisen la ki shong madan ne shong ha dukan. Kane ka seng ka kwah ban ïada ïa ki briew lajong ne ïa ki bar jylla? Balei ka ktah ïa ki?” u la buh jingkylli.
U la ong, “Ka KHADC ka pyntrei kam ïa ka aiñ ka don, ba ki bar jylla ki ba shong madan ne ha dukan kim lah ban khaïi lada kim don ïa ka trading laisen, kata nga kren shai bad ki dei ban sngewthuh. Ngi khlem kyndang ïa ki para doh parasnam ki ba shong dukan hynrei tang ïa ki barjylla ki bym don laisen kim lah ban khaïi hangne”.
U la bynrap ba “Nga sngew ba kane ka jingthoh jong ki, ka dei ka bymdon nongrim, bad ka bymdon jingïadei bad ka Court Order ka ba ki ïoh, ka khlem ong ba ki lah ban shong dukan katba mon kin leh ki kam khaïi katba mon”.
