SHILLONG:
U Dkhot jong ka Regional Committee, ban pynbeit ïa ka kam khappud kaba la neh da ki phew snem bad ka jylla Assam, u Bah Charles Margnar u la ong ba bun na ki kynhun kiba don bynta kim sngew hun halor ka ‘Memorandum of Understanding’ kaba la dep ban ïasoi hapdeng ki artylli ki sorkar kata ka sorkar Meghalaya bad Assam ha ka wat kaba nyngkong, hynrei mynta ki la sdang ban ïa kren ïa ka wat kaba ar.
Lah ban kdew hangne ba ka sorkar Meghalaya bad Assam ha ka 29 tarik Lber jong u snem ba la dep ki la ïasoi ïa ka MoU ban ïa pynbeit noh ïa u pud u sam ha ki hynriew tylli ki jaka ba ïa kajia pud, hynrei ki mat jingeh hadien ba ki kynhun kiba don bynta lang ki pynpaw ïaka jingpyrshah.
“Katkum ka jingsngewthuh jong nga ka sorkar ka dei ban pynsangeh shuwa shipor ïa ka wat kaba ar. Ki dei ban sngewthuh ïa ka jingsngew jong ki paidbah,” ong u Bah Charles.
U ne u Nongmihkhmat jong ka seng Congress na Mawhati u la ong ba ka wat kaba ar ban pynbeit ïa ka jingïakajia pud kam dei ban ïaid sha khmat namar ka MoU kaba la ïasoi ha ka wat kaba ar ym shym la pdiang ïaka da ki briew kiba don bynta lang khamtam ki nongïalam shnong, ha kaba ki la leit ban ujor sha ka ïingbishar ba ha khklieh duh kata sha ka Supreme Court halor kane ka mat.
U la kyntu ïa kasorkar ban pynbiet shuwa ïa ka wat kaba nyngkong bad sa sdang ïaka wat kaba ar.
U Bah Charles u la ong ruh ba na ka liang ka jong u kum u dkhot un sa kren hapoh ka regional committee jong ka Ri-Bhoi, haba kane ka komiti kan shong pyrkhat , hynrei kumba long mynta kane ka komiti kam pat don ka jingïakynduh haduh mynta ban ïakren.
Ka sorkar ba thymmai jong ka jylla Meghalaya ka Meghalaya Democratic Allaince 2.0 ha ka 24 tarik u Lber ka la thaw ïa ki lai tylli ki regional committee kiba la khlieh da ki Myntri Sorkar ban peit halor ka long ka man jong ki hynriew tylli ki jaka kajia pud bad ka jylla Assam.
Ka wat kaba ar ka kynthup ïa ki hynriew tylli ki jaka kata ka Langpih ha West Khasi Hills District; ka Borduar, Nongwah- Mawtamur, Deshdoomreah, Block-ll jong ka Ri-Bhoi District; Block-l, Psiar-Khanduli ha West Jaintia Hills District.
