SHILLONG:
Na ka por sha ka por la ïohi ba bun na ki nongñiah kali hapoh ka sor Shillong kim ju kheiñsnep bad kim ju bud ryntih ïa ki kyndon kiba la buh, khamtam ha ka por ba la jan poi ha ki jaka ba don ki Zebra Crossing ne ki jaka ba ki briew ki lah ban jam na shiliang sha shiliang surok.
U Kynjatshai u la ïoh ban buddien halor kane ka rukom long ka jingïaid jingïeng jong ki kali la ki bud ryntih shisha ne em ïa kane. Ha kane ka jingbuddien la ïohi ba bun na ki nongñiah kali ki khlem da bud pyrkhing ïa kaei kaba dei ba kin bud bad bunsien la ïohi ba wat haba la don ka por ba ki briew ki hap ban jam na shilliang sha shilliang ka surok lyngba kine ki Zebra Crossing, la ïohi ba kine ki kali kim ju kham ailad ïa ki paidbah ban iaid don tang katto katne eh kiba burom ïa kane.
Kawei ka jingeh ba kine ki kali ki ïoh mon ban ïaid katba mon, khlem da bud ryntih ïa ki aiñ ki kanun, kadei ka jingbym don ki nongpeit na ka liang ka tnad Pulit Traffic.
Haba ïakren bad uwei na ki riew rangbah, u la pynpaw ka jingsngewkhia ïa kane ka jingbym burom jong ki nongñiah kali ïa kine ki Zebra Crossing. “Teng teng haba ngi don tang iwei lane arngut kiba mut ban ïaid na shilliang sha shilliang lyngba kine ki Zebra Crossing, kine ki kali kim ju ailad ïangi ban ïaid. Kane ka pyntieng ïangi ïoh ngi mynsaw,namar ha ka jinglong rangbah ngim lah ban ïaid sted. Don tang katto katne kiba sngewthuh hynrei kiba bun hi kim ju sngewthuh”.
Kawei na ki samla ka la ong, “Kaba lyngngoh ban ïohi ba kine ki kali haba ki poi hajan kine ki Zebra Crossing, wat lada ki ïohi ïa ki briew ba mut ïaid na shilliang sha shilliang surok, kim ailad tad ynda rah ïa ki kti, tang hangta hi ki sngewthuh ba ki hap ban pynsuki ïa ki kali jong ki. Kane kamdei tang shisien hynrei man ka por ngi hap ban mad ïa kum kine. Imat kine kiba ñiah kali kim sngewthuh kaei ka jingmut jong kane ka Zebra Crossing. “.
Na ka liang kine ki katto katne ki la kyntu ia ka sorkar kumjuh ia ka tnad pulit kaba dei peit ïa ki kali ba kin thaw da kiwei ki lad ki lynti lane da ki jingai jinghikai khnang ba ki nongñiah kali kin sngewthuh bha shaphang ka mut aïu kane ka Zebra Crossing.
