SHILLONG:
U Myntri Rangbah ka jylla u Conrad K Sangma, u la ïathuh ba ka sorkar jylla ka hap ban pynlut ym duna ïa ka T. 600 klur na ka State revenue ha ka shisnem, na ka bynta ban pynbiang pynbit ïa ka tnad bording ka ba kynthup ruh ban thied ïa ka bording elektrik na kiwei ki jylla.
Haba kren halor ka ka tnad bording ha ka jylla, u Myntri Rangbah u la ong “Ka Umïam ka la poi haduh u pud ban hap khang noh ka jingpynmih ïa ka bording elektrik, namar ka jingbym hap u slap, une u dei u bnai u ba jynjar bha ïa ka jylla namar kam ïoh ïa u slap na ka bynta ban pynmih bording, hynrei kumba ka long mynta ym tang ka jylla Meghalaya hynrei kiwei kiwei ki jylla ruh ki mad ka juh ka jingeh na ka jingbym don slap”.
“Lada nga kdew ïa ka jingwad lad ka sorkar ban weng ïa kane ka jingeh, ka sorkar mynta la 2 snem, ka pynlut ym duna ïa ka T. 600 klur na ka state revenue, na ka bynta ban siew ïa ki jinglut jingsep bapher bapher ha ka tnad bording, ka ba kynthup ruh ïa ka jingthied ïa ka bording elektrik bad ban pyndap ïa ka bording kumba ka long mynta”, u la ong.
“Ngi ju thied ïa ka bording elektrik, T. 3 klur man ka sngi, haduh mynta bad lada kane kan dang bteng sa 100 sngi ngin hap ban pynlut haduh T.300 klur tang ban thied bording kat ban lah ban pynneh kumba ka long mynta, ha ryngkat ka jingpynlip bording katkum ka kynta ba la buh”, u la bynrap.
U la ong shuh shuh ba “kane ka jingthied bording ka long ban pyndap bad pynthikna ban ym pynjlan ïa ka jingshah pynlip bording ha ka jylla bad kum ka sorkar ka khlem shong kli kti, hynrei ka treishitom ban pynthikna ba kan neh kumne kumba ka long mynta”.
“Ngi donkam ïa u slap ban ïoh ban pynmih bording eklektrik hynrei ka sorkar kan dang pyrshang ban wad ruh ïa kiwei pat ki lad ban long ka jingïarap ka ban neh shirta bad ban weng ïa kane ka jingeh”, u la bynrap.
U Myntri Rangbah ka jylla u la ong, “Kawei ka lad ka ba ka sorkar ka la pyrshang mynta ka long ka jingsdang ïa ka Solar Mission, kane ka dei ka sienjam ka ba, wat la ka long ka ba dang hap ban shim por hynrei nga kyrmen ba ha ki 2-3 snem ban wan ngin lah ban ïoh jingmyntoi na ka bor sngi”.
U myntri rangbah u la pynpaw ruh ïa ka jingkyrmen ban lah ban pynmih bording electrick na ka Thermal Producing Plan, da ka ba ong, “Hadien ba ngi la ïoh ïa ki laisen ban tih dewïong ngi kyrmen ban ïoh ban sdang noh ïa ki Thermal Plan ruh bad kane kan long ka sienjam kaba lah ban neh shrita bad ka ba lah ban pynurlong noh ha ki 3-4 snem ban wan”.
“Ka sorkar ka dang shim ïa ki sienjam ki ba donkam ban weng ïa kane ka jingeh bad ha kine ki bnai ba la dep haduh mynta ka jinglong jingman ka long ka ba jynjar bad ka dei ruh ka por ka ba ka MeECL ka mad ïa ka jingeh ka ba khraw namar ki ba bun ki daw”, u la ong.
U la kdew ruh, “Kawei ka jingeh ka long halor ka jingbuh dor hi na ka Central Electricity Regulatory Commission (CERC), bad ngim don ka bor ban buh dor ïa ka bording eklektrik bad ka Regulatory Commission, ka buh ïa ka dor ka ba ki ba pyndonkam bording ka ba pynlong ba kiba pyndonkam bording eklektrik ha ïing ki sem ki hap ban siew khambun ban ïa kiba pyndonkam bording eklektrik ha ki karkhana”.
U Myntri Rangbah u la ïathuh ruh, “Na ka liang ka sorkar ka la kyrpad sha ka CERC, ba ki kharkhana ki dei ban siew kham bun ban ïa ki ba pyndonkam bording ha ïing, hynrei ngim shem la ïoh kano kano ka jingpyntip na ka Commission, hynrei ka sorkar ka dang ïakren halor kane ka bynta, bad ngin pyrshang ban pynbeit ïa kane ka bynta bad kine ki jingeh hap ban pynbeit lada kwah ban don ka jingkiew ka ba neh ha ka MeECL”.
“Nalor katne ngi don ruh ki jingduhnong ha ka AT&C hynrei ha kine ki snem mynat kane ka la kham duna hynrei dang donkam shibun ban pynbha dei na ka ne ka daw ba ka skim Revamped Distribution Sector Scheme ( RDSS) la pyntreikam mynta, ban pynthikna ban don u meter u ba biang, ban pynduna ïa ka jingduhnong bad ngin hap ban pynbha shuh shuh ïa ki jaka pynmih bording eklektrik, bad ban dang wad ïa kiwei pat ki lad ki lynti ha ka ba ïadei bad ka jingpynmih bording eklektrik ha ka jylla”, u la ong.
Haba kylli halor ka jingkynnoh u Myntri Rangbah barim ka jylla u Dr Mukul Sangma halor ka jingmad jingeh ka jylla ha ka ba ïadei bad ka bording eklektrik, u Conrad u la ong, “Ki don bun ki project ki ba la soi ha kato ka por, hynrei ym ba ngi la pynduh pyndam ïa kine ki project khlem bishar hynrei ngi la buh da ka Committee ban bishar shwa ban pynduh pyndam ïa kine ki project, bad hadien ba la bishar la shem ba kine ki project ki ba la sdang ki bun ki jingduna ki ba lada ngi ïaid shakhmat kin buh ïa ka jylla ha ka jingeh bakhraw kumta ngi pynduh pyndam noh”.
“Ha ka ba ïadei bad ka jingshna ïa ki jaka ban pynmih bording, ngin hap bud ïa ki kyndon, hynrei ki khlem bud ïa kita bad ka long ka ba bakla ban shu ïa kynnoh uwei ïa uwei, bad lada nga kwah ban shu kdew kti beit ki bun kiei kiei ki ba nga lah ban kdew hynrei kane kan ym lah ban ïarap ïa ka jylla na kane ka jingeh”, u la bynrap.
