NONGSTOIÑ:
Ki nongtrei ASHA jong ka West Khasi Hills ASHA Association ha ryngkat ka jingïasnoh kti lang ka Meghalaya ASHA Worker Union mynta ka sngi kila pynlong da ka jingïaïaid rally kaba jai jai hapoh sor Nongstoiñ kum ka dak ban bteng ïa ka jingïakhih ka jong ki ban pynpaw ruh ïa ka jingbym hun ïa ka jubab jong ka Myntri ka koit ka khiah ka Dr. Ampareen Lyngdoh halor ki mat jingdawa jong ki ASHA.
Ïa ka tei ka rally ba jai jai la sdang na MCH Hospital Nongstoiñ bad ïaid ter ter ka ïew Nongstoiñ bad pynkut hapoh ka Market Complex bad bteng pat sa ka jingïalang paidbah ha kaba la sakhi da ki spah ngut ki nongtrei ASHA ha WKH kila wan ban ïashim bynta ha katei ka rally.
Ka jingïakhih jong ki ASHA da kaba sangeh treikam kala ktah ïa ka kam shakri ïa ki paidbah ha ka koit ka khiah hapoh ka District hynrei na ka liang jong ki nongïalam jong ki nongtrei ASHA kila kyrpad ïa ki paidbah ba kin ai jingkyrshan lem ïa ki khnang ba kin ïoh ïa ki jingdawa jong ki na ka sorkar kaba kila ïakhun la bun bun snem.
Ka President jong ka Meghalaya ASHA Worker Union ka kong Mirajune Myrsing haba ai jingkren ha ka jingïalang paidbah kaba la long ha khmat ka Market Complex New Nongstoiñ kala ong ba ki nongtrei ASHA kidei kiba kongsam tam ban shakri ha ka koit ka khiah pynban ka sorkar kam ithuh bad niew bein ïa ki da kaba ai ka jingtrei kaba khia katba ka jingsiew ka rit na kiba rit tam.
Shuh shuh kala ong ruh ba katkum ka jingkhang jong ka Myntri ka koit ka khiah kala ong ba ki nongtrei ASHA kidei tang ki nongtreimon sngewbha kiba lah ban trei tang 2 snem ha kaba katei ka nongïalam ki ASHA kala buh jingkylli ruh ïa ka Myntri sorkar kumno ka lah ban long ba ki ASHA kin trei tang 2 snem katba ka katkum ka National Health Mission (NHM) la ong ba ki ASHA kiba trei palat ïa ka 10 snem kin ïoh ïa ka khusnam golden handshake ryngkat ka song pisa kaba 20 hajar tyngka bad lyngba ka NHM kala pynshisha ba ki ASHA ki lah ban trei palat ïa ka 2 snem.
Kumta katei ka nongialam kala dawa na ka sorkar ba kadei ban pynkiew ïa ka Bai ong ki nongtrei ASHA hapoh ka Jylla nalor kiwei de ki lad jingïarap ki ban ai jingmyntoi ïa ki nongtrei bad kala ong ruh ba katba ym pat ïoh ïa ki jingdawa ki ASHA kin nym leit phai sha ki jingtreikam.
Kiwei kiwei kiba la ai jingkren ha katei ka jingïalang ki kynthup ïa ka kong Linianci Marweiñ President Asha Workers Union Nongstoiñ, Kyntiewmon Nongshli, President Asha Workers Union Mawshynrut, Srally Rashir, Sordar of New Nongstoiñ nalor kiwei de.
