SHILLONG:
U Symbud Myntri Rangbah ka jylla u Bah Sniawbhalang Dhar, ha ka 19 Ïaïong u la ong ba ka sorkar jylla kan ïaid noh shakhmat, hadien ba ki nongïalam ka Harijan Panchayat Committee (HPC) ki khlem lah ban ai ka jubab ha ka tarik ba la buh.
“Ngi lah ban buh ïa ka jingïalang ha ka taïew ban wan ban ïakren halor kane ka mat, ngin sa pynbeit noh ïa ka sngi ban pynlong da ka jingïalang”.
U Symbud Myntri Rangbah ka Jylla u la ïathuh ba ka sorkar kam shym pat ïoh ïa kano kano ka jubab na ka Harijan Panchayat Committee (HPC), watla ka jingai por ka sorkar jylla kala kut noh haka 10 tarik mynta u bnai.
U la ong, “Ngim pat ïoh ïa kano kano ka jubab na ka liang ka HPC hynrei ynda u Symbud Myntri Rangbah ka jylla, u Bah Prestone Tynsong ula wanphai sha ka jylla ngin sa buh ïa ka sngi ban pynlong ïa ka jingïalang”
Haba kylli ka daw ba ka HPC kam shym la ai ïaka jubab, u Bah Dhar u la ong, “Ka daw dei ban kylli na ki nongïalam ka HPC balei ba kam jubab bad kadei ka kamram ka jong ki ban ai ïaka jubab”.
U la bynrap shuh shuh “Lada kim ai ka jubab ruh, ka sorkar kan sa shong ïaka jingïalang ban ïakren halor kane ka bynta, namar ba ka jingdon jong ngi hangne ka long ban shim ïa ka rai na ka bynta ka jong ki”.
“Na ka liang ka sorkar ka la ïaleh katba lah ban pynbeit kloi noh ïa kane ka mat khamtam hadien ba ka iingkashari ruh kala bthah”, u la bynrap.
Kumban shu pynkynmaw, u Bah Prestone Tynsong, Symbud Myntri Rangbah u ba dei ruh u Chairman ka High Level Committee (HLC) haba kren bad ki lad pathai khubor ha ka 12 tarik mynta u Ïaïong, u la kren ïa kitei kijuh ki kyntien, kata ban buh ïa ka sngi ynda u Bah Sniawbhalang Dhar u la wan sha ka jylla.
“Ynda u Symbud Myntri Rangbah ka jylla u ba dei peit ruh ïa ka tnad pynroi sor u Bah Sniawbhalang Dhar u la wan sha ka jylla ngin sa ïa buh ïa ka sngi ban ïa kynduh ïa ki nongïalam, ka HPC”, ki dei ki kyntien ba la kren da u Bah Prestone.
