SHILLONG:
Ka Sengna Rilum Garo, ka Achik Conscious Holistically Integrated Krima (ACHIK) ka la byrngem ban tan ïa u President ka Voice of the People (VPP), u Bah Ardent Miller Basaiawmoit sha ïingkashari jong ka Supreme Court.
Katkum ka kyrwoh ba la phah da ka ACHIK, ka la byrngem ïa ban tan ïa u nongïalam ka VPP sha Supreme Court, lada ki jaitbynriew Garo, kin duh wat tang 0.01% ruh na ka hok ba ki dei ban ïoh kat kum ka Job Reservation Policy.
“Ngi sngew ba ka long ka bym sngewtynnad satia ba u MLA ka VPP u la leh drama halor Job Reservation Policy”, la ong ka General Secretary ka ACHIK ka Advocate Bernita R Marak.
Ha ka kyrwoh ka Bernita kala kdew, “Lada u Bah Ardent Miller Basaiawmoit, u sngew ba u don sha ka liang ki ba shah ktah, u dei ban leit mudui shi syndon hapoh ka ïingbishar Supreme Court halor ka Job Reservation Policy”.
Ka la bynrap “Lada don kiba sngew ba ki shah ktah da ka hukum lane ka policy, ki long kiba laitluid ban leit sha ïingbishar Supreme Court, ha ka jaka ban kynshoit ïa ka jingsngew pher jaidbynriew ka bymdon nongrim”.
Ka Bernita kala ong, “Kane ka mat kam dei halor ka jingïapher jaidbynriew lane ka mat ban wanrah ïa ka jingïakynad pher jaidbynriew namar kane ka mat ka dei halor kaba dei bad kaba bakla, ka jingïaryngkat, ka jingbishar hok”.
“Ka ACHIK ka sngew ba lada u Bah Ardent Basaiawmoit u sngew ba ka 60-80% ka Job Reservation Policy ka dei kaba ïoh ïa kaba la kyntait, u long uba laitluid ban leit mudui sha Supreme Court halor kane ka mat haka jaka ban shu leh drama ban pynkhihwin”.
“Ka ne ka organization ka sngew ba u la shim ïa kane ka mat bad leh kumba ak phlim tang ban pynbyrngia, haba u tip ba u don da kiwei pat ki lynti”.
“Ka ACHIK ka maham ba lada u Bah Ardent u lah ban pynkylla wat tang 0.01% ïa ka hok ba dei ban ïoh da ki jaidbynriew Achik na ka Job Reservation Policy, ka ïingbishar Supreme Court kan dei ka jaka kaba ka ACHIK kan ïakynduh ïa u”, ong ka Bernita.
