SHILLONG :
Ka jylla ha ka 25 tarik u Risaw ka lah kynmaw burom ïa ka lyngkhuh sngi ïap ba 31 jong u Captian Williamson A. Sangma; ha kaba ïadei bad kane ka lyngkhuh sngi ïap jong u Captian Williamson A. Sangma na ka liang u Myntri Rangbah ka jylla u Conrad K Sangma ha ka jingpyllait khubor lyngba ki social media u la pynpaw bad ong “Ngi kynmaw burom ïa u Myntri Rangbah ba nyngkong duh jong ka jylla bad u Lat ba nyngkong na ki Thaiñ Shatei Lam Mihngi ka ri u Captain Williamson A. Sangma ha ka lyngkhuh sngi ïap jong u .U dei uwei na ki nongïalam ba khraw uba la trei na ka bynta ban ïada ïa ka jingithuh paw jong ki trai ri trai muluk bad uwei na ki nongïalam bad ki nongprat lynti halor ka jinglah ban ïoh la ka jong ka jylla Meghalaya”.
Ka kyrteng ba pura jong u Williamson A Sangma ka dei u Williamson Ampang Sangma bad la kha ïa u ha ka 18 tarik u Risaw 1919 ha Baghmara, South Garo Hills bad u la khlad pat ha ka 25 tarik u Risaw 1990, u long uwei napdeng ki nongïalam ba khraw jong ki Garo, uba nyngkong ban long u Myntri Rangbah ka jylla Meghalaya, bad u dei ruh u Lat ba nyngkong jong ka jylla Mizoram napdeng ki Garo uba la bat ïa kane ka kam ha u snem 1989.
Hapdeng ba u long u shipai, u Sangma u la rung sha ki kam saiñ hima ha u snem 1952, bad u la shah jied kum u Chief executive member jong ka Garo Hills Autonomous District Council (GHADC). Dei ha u snem 1954 ba ki dkhot ka executive committees jong ka Autonomous District Council of the Garo Hills (GHADC), Khasi (Khasi Hills Autonomous District Council), Jaintia Hills (Jaintia Hills Autonomous District Council), Lushai Hills (Mizo Hills),bad North Cachar Hills District Council ki la khot pynlong ïa ka jingïalang ha nongbah Shillong bad shim rai ban dawa la ka jong ka jylla.
Watla u Wilson Reade, uba long u shongknor jong ka Khasi National Durba, uba nyngkong ban lamkhmat ha ka jingdawa la ka jong ka jylla na ka bynta ki riewlum, hynrei dei u Sangma uba la pyntyllun ïa ka kam ban poi sha ka thong jong ka jingjop. U la lamkhmat halor kane ka jingïakhun hapdeng ki Garo, Jaintia, bad ki Khasi naduh ki spah snem jong ka 1950.
Kum ka dak ka jingburom ïa u Captian Williamson A. Sangmane ka jylla ka la ai nam ruh ïa ka Museum jong ka jylla kaba la tei ha nongbah Shillong ha u snem 1975 lyngba ka Department of Education hapoh ba don ka mala jong ka dorbar thaw aiñ bad ba la tip kum ka Captain Williamson Sangma State Museum
