SHILLONG:
Hadien ka jingkren jong u MP ka Shillong, u Bah Vincent Pala uba dei ruh u nongïalam jong ka seng Congress ha ka jylla ba ka Congress ka long kaba la kloi ban ïathaw sorkar lang bad ka MDA II, na ka liang ka Bharatiya Janata Party (BJP) ha ka kyrwoh khubor ba la ai lyngba u nongaiktien jong ka, u Bah Mariahom Kharkrang, ka la ong ba ka jingkren jong ka Congress kam don nongrim haei haei ruh, hynrei ka dei tang ka buit poh ban pynpaw paidbah ïalade ha ki lad pathai khubor.
Ha ka kyrwoh khubor ka BJP ka la ong, “Baroh ki ïatip ba ka Congress ka dei ka lieng kaba la ngam ha Meghalaya bad ha ka ri baroh kawei bad ymdon shuh mano mano ruh ba lah ban pynlait pat ïa ka na kane ka jingngam”.
Ka BJP ka la ong ruh ba ka bha ïa ka Congress ban shu ngeit beit ba ki la don shabar na ka MDA II.
Ka BJP ka la kynnoh ruh ba kane ka jingkren jong ka Congress ka dei tang ka buit poh jong ka ba kiwei kin phai khmat sha ka bad ban knieh ïa ka jingieit bad ka burom ba u Myntri Rangbahduh ka ri u la ïoh haduh ki ri jong ka pyrthei.
“Kane ka pynpaw shai ïa ka jingtieng jong ka Congress ïa ka jingtreikam ba khuid bad bym ailad ka BJP ïa ka kam bamsap”, la ong shuh shuh ka kyrwoh ka BJP.
Ka BJP ka la ong ruh ba ka Congress kaba la budnam ha ki kam sniew bad kam thok kam shukor, “Ban pynïaid ïa ka sorkar kaba khlem bamsap ka dei tang ka jingphohsniew ïa ki”.
Ha kane ka kyrwoh khubor, ka BJP ka la kynnoh ruh ba ka jingphohsniew ka Congress ba kiwei kin iehnoh ïa ka BJP bad ban ïatreilang bad ki ka dei ka jingkren beiñ ïa ka jingkhraw ka jingïatreilang ha ka saiñpyrthei.
“Ki paidbah ka jylla ki tip bha ba ka BJP ka dei ka lok kaba khlaiñ bad kaba skhem ha ka MDA 2 bad ka jingdon jong ka ha ka sorkar synrop ka pynlong ïa ka MDA 2 ban don ka jingthrang ban thaw ki policy kiba buh ïa u paidbah hapdeng bad ka roi ka par kum ka mat treikam jong ka”, la ong shuh shuh ka kyrwoh jong ka BJP.
Ka BJP ka la ong ruh ba ki paidbah nongshong shnong hi ki tip khambha ba ka BJP ka dei kaba donkam bha hapoh ka MDA 2 kaba peit pyrman ïa ka rukom treikam ka sorkar bad ha kajuh ka por kaba pynthikna ba ki jingtreikam ka sorkar pdeng na ka bynta ka jingmyntoi ki paidbah ka poi sha kiba dei hok ban ïoh.
