SHILLONG:
U President ka Khun Hynniewtrep National Awakening Movement (KHNAM) State Youth Wing, u Bah Thomas Passah mynta ka sngi u la dawa ba u Myntri Rangbah ka jylla u Conrad K. Sangma bad u Myntri ka tnad kam pohïing ka sorkar jylla u Bah Lahkmen Rymbui ba ki dei ban hiar shuki noh mardor na ka kam ba ki bat namar ba kim lah ban ïalam ïa ka jylla.
U Bah Thomas haba kren sha ki lad pathai khubor u la ong ba ka jingkhang ïa ki Internet ha kane ka jylla ka long kumba la pynkheiñ ïa ka hok ban ïoh jingtip ka Right to Information. U la ong ba ka sorkar kam dei ban pynduh ïa ka hok ïoh jingtip jong ki paidbah tang na ka daw ba don kata ka jingjia ba sngewsih ha Mukroh. U la ong ba kane ka jingpynsangeh ïa ka jingai jingtip kadei tang ka jingaidaw jong u myntri rangbah.
U Bah Thomas u la pynrem jur ïa kane ka sorkar ba kam shym la lah ban shim kano kano ka jingkitkhlieh na ka daw halor ka jingshah siat ïap ki 5 ngut ki mynsiem ba kordor ha ki pulit jong ka Assam.
U Bah Thomas u la ong ba kane ka jingjia ka paw shai ba ka pulit Assam ki dei kiba leh heh bad leh donbor namar ki la ïohbor na u Myntri Rangbah ka jylla u Himanta Biswa Sarma bad kane ka pyni katno ka sorkar Meghalaya ka long kaba khawpud haduh katta.
Ha kajuh ka por ka KHNAM ka la dawa ïa ka sorkar jylla ba dei ban leit kem mardor ïa kito ki pulit ka Assam kiba wan sha Mukroh ban shim ïa ka jingim jong ki 5 ngut ki mynsiem briew.
U Bah Thomas u la ong ba lada ka sorkar ka thmu ban wanrah da kita ki jingtohkit lyngba ka Central Bureau of Investigation (CBI) bad kiwei kam don jingmut ei ei, lada ka sorkar jylla kam lah ban phah kem ïa ki pulit ka Assam kiba wan sha kane ka thaiñ Mukroh.
“Kine ki 7 ngut ki nongmihkhmat ka Dorbar Thawaiñ na Jaiñtia Hills ki leh aiu bad kumjuh na ka liang u MLA ka Mukroh ym ïohi ba un shim khia tang khyndiat ruh”, u la ong.
U Bah Thomas u la ong ba u Myntri Rangbah ka jylla um long uba biang ban long u nongïalam ka jylla khamtam ha kaba ïadei bad ka kam khappud, kumta mardor u dei ban hiar shuki noh. U la ong ba lada kiwei pat ki party ki dang kyrshan ïa kane ka sorkar ba mynta ba la ïalam da ka National People’s Party (NPP), ki hap ban don ka jingkitkhieh na ka bynta kane kam ïap kam im u paidbah ka jylla Meghalaya. Ha kajuh ka por ka kyrtong ka North Shillong ka kong Elgiva Gwyneth Rynjah ka la phah ka jingsngewlem sha kiba haïing hasem jong kito kiba shah pynïap ha Mukroh ha kaba ïadei bad kane ka jingjia ba sngewsih ka seng Meghalaya Pradesh Trinamool Congress (TMC) ka la pyllong da ka jingthang mombati ha Khyndailad.
