SHILLONG:
Ki nongkhaïi jhur bad ki nongkhaïi Sying ha ka 31 tarik Jymmang ka la mynjur ban nym pdiang ïa ka jingpynbna da ka Khasi Hills Autonomous District Council (KHADC) kaba la pynmih ha ka 15 tarik mynta u bnai ha kaba ïadei bad ka jingot kilo.
Ïa kane ka kynhun la tip kum ka Joint Action Committee (JAC) Khasi Jaiñtia Fresh Vegetables and Ginger Trader Association, kaba kynthup ïa ki seng kum ka Khasi Jaintia Fresh Vegetables Suppliers Association, ka Shillong Traders Association, Iewduh Khasi Pnar Association bad ka Fresh Green Ginger Ri-Bhoi District, ki la dep buh ïa ka JAC kaba la shim ïa ka rai ban pyrshah ïa ka jingpynbna jong ka KHADC kaba pyrshah ïa ka jingot kilo ïa ki mar-rep.
U President uban khlieh ïa ka JAC udei u Bah Brister Mawthoh bad u Secretary u Bah Raji Kharlur lem bad kiwei.
Kane ka JAC ka la dawa ïa ka sorkar kumjuh ruh ïa ka KHADC ban pyllong da ka jingïalang hadpeng ki nongkhaïi jhur, nongkhaïi sying bad ki kynhun nongrep ban rai da kawei ka jingmut ban ïa pynbeit ïa kane ka jingeh lym kumta kin ïai bteng beit ïa kane ka jingot kilo kumba ju long.
Lah ban pynkynmaw ba ha ka 24 tarik mynta u bnai na ka liang ka Hills Farmer’s Union (HFU) bad ki nongkhaïi sying lem bad kiwei ki para nongkhaïi ki la pyllong ka jingïalang halor kane ka mat bad ka la mih ruh ka jingbym-ïa-sngewthuh jingmut hadpeng kine ki arliang mamla. Na ka liang ka seng HFU ka la dawa beit ban pyntreikam ïa kane ka jingpynbna kaba la pynmih da ka KHADC, katba na ka lïang ki nongkhaïi pat ki kim treh namar ki ong, “Balei yn treikam tang ha kawei ne ar ki jaka, lada pyntreikam dei ban pyntrei beit ha baroh kawei Khasi bad Jaiñtia”.
Ha kane ka jingïalang jong ki nongkhaïi bahper bapher ryngkat ka seng HFU, ki la pyllong ka jingïalang ban ïakren halor kane ka jingeh, ka la mih ruh ka jingïabym ïahun hapdeng ki nongkhaïi bad ka seng HFU bad katto katne ki nongrep, haduh ka la poi ba ki katto katne ki nongrep ki la hap ban kit noh ïa la ki sying sha ïing.
Na ka liang ki nongkhaïi ruh kim don jingtip halor kane ka jingpynbna kaba la pynmih da ka KHADC kumta kim pdiang katba ym pat lah ban pyntreikam salonsar ïa ka ha baroh kawei ka Ri Khasi bad Jaiñtia.
