SHILLONG:
Kum ka dak ban ai jingkyrshan bad ai mynsiem lem ïa u nongïalam ka Voice of The People’s Party (VPP) u Bah Ardent Basaiawmoit uba la shah thngan khlem buh pud, ki paidbah ka Thaiñ Riwar Mihngi kin pyllong ka jingïaid paidbah ba jai jai ha ka 1 tarik u Jylliew, 2023 ha ka por 11 baje mynstep ha Additional Parking Lot, Secretariat, Shillong.
Kane ka jingïaid paidbah ka long shibynta ban ai jingkyrshan lem ïa u Bah Ardent u ba la shahthngan mynta la 8 sngi kynthih, halor ka mat jingdawa ban pynbeit thymmai ïa ka Reservation Policy da ka sorkar Meghalaya Democratic Alliance (MDA 2.0) ba la ïalam da u myntri rangbah ka jylla u Conrad K. Sangma.
Na ka liang ki paid ka thaiñ Riwar Mihngi, ki la ïawer ïa baroh ki sordar, ki Rangbah Shnong, ki paitbah bad kumjuh ruh ki khynnah skul jong baroh ka thaiñ ba kin ïawan ryntih lang ha katei ka sngi bad ba kin wan da kaba jai jai ryngkat ki jingthoh lane ki placard.
