NONGPOH:
Hadien ba la sakhi ïa ka jingshah lehbeiñ ki Khristan ha Manipur, bad ha kiwei ki jaka ha ka Ri India, kaba kynthup ïa ka jingshah thang ki Ïingmane Khristan bad ki skul bad ka jingïakulmar hapdeng ki jaitbynriew Meitei bad ki Kuki, ka Ri Bhoi zone jong ka Conference of Religious India (CRI) ka la pynlong ïa ka jingïalang kaba lyngkot hakhmat jong ka Nongpoh Town Shopping Complex, ha kaba la pynlong ruh ïa ka jingïaid paidbah jong ka jingsuk ha ka surok bah ha Nongpoh. Ka jingpynlong ïa kane ka jingïalang bad ka jingïaid paidbah ka long ban banjur ïa ka jingdonkam jong ka jingïalong kawei hapdeng ki paidbah jong ka Ri.
La wan ïashim bynta ha kane ka jingïalang bad ka jingïaid paidbah ha Nongpoh da ki nongïalam balang na ka thaiñ mihngi kaba kynthup ïa u Br. Varghese SG, ka Sr. Esconciana Vaz MSMHC (NE Regional Secretary), ka Sr. Prema Chowallur SCC (Convener jong ka North East FORUM of Religious for Justice and Peace), ka Sr. Teresa Kamasuam FMA, u Fr. Laurence Kharluni (CRI Shillong President, Shillong Archdiocese), u Br. Sunil Britto CFC (CRI Ri Bhoi President), ka Sr. Melita Syiem MSMHC, ki samla jong ka St. Stephen Hostel Girls, u Bah Opel Lyngdoh (Rangbah shnong ka Nongpoh), bad kiwei kiwei.
Ha kane ka jingïaid paidbah, ki nongïashim bynta ki la rah ruh ïa ki plakad ban pynrem ïa ka jingshah lehbeiñ ki Khristan ha ka jylla Manipur. Ki la kyntu ruh ïa ka sorkar Manipur bad ka sorkar pdeng ban ïada ïa ki Khristan ha ka jylla, khamtam da kaba shim ïa ki sienjam ban pynkut noh ïa ki jingïakulmar bad ban wanrah biang ïa ka jingshong suk sha ki paidbah.
