SHILLONG:
U Myntri Rangbah ka jylla, u Conrad Sangma, ha ka 14 tarik Ïaïong u la pynlong ïa ka jingïalang ban ïatai halor ki jingduna kiba kongsan bad ban pynkhreh ïa ka rukom treikam bad ka lynti kumno ban pynthymmai bad pynbha ïa ki lai tylli ki wah kiba kongsan, kita ka Wahumkhrah, ka Wah Umshyrpi bad ka Wah Umkhen, da kaba shim ruh ïa ka jingai jingmut jong ki dorbar shnong.
U Myntri Rangbah u la ong ba ka donkam ban don ka jingïaryngkat hapdeng ka mariang bad ka ïoh ka kot bad u la bynrap, “Ka jingïalang kaba ngi la pynlong mynta ka sngi ka long shi bynta jong ka mat kaba kham heh jong ka sorkar jylla ban don ka jingïaryngkat hapdeng ka kamai ka kajih, ka ïoh ka kot bad ka mariang, khnang ba lada la pynbiang ïa ki jingdonkam ha ka ïoh ka kot, la ri sumar ïa ka mariang ruh na ka bynta ki pateng ki ban wan.”
La pynlong ïa kane ka jingïalang ha Yojana Bhawan, ha kaba la ïashim bynta u Myntri Rangbah ka jylla, u Symbud Myntri Rangbah ka jylla u Bah Sniawbhalang Dhar, u Myntri sorkar u Bah AL Hek, u Chief Secretary u Bah DP Wahlang, ki heh ophisar, ki dkhot jong ki dorbar shnong bad ki nongmihkhmat na ki seng ha ka imlang ka sahlang.
Ha kawei pat ka liang, u Chief Secretary u la ïathuh ba bun ki kam ban pyntrei yn shimti ha ki jaka jong ka municipal hapoh ka AMRUT 2.0, bad u la bynrap ruh ba ha kaba ïadei bad ka NGT T.110 klur la mang ban pynkhuid ïa ka Shillong bad ïa ki sawdong sawkun jong ka.
