SHILLONG:
U Bah Titosstarwell Chyne, u Chief Executive Member (CEM) ka Khasi Hills Autonomous District Council (KHADC) u la ïathuh ba ki laitylli ki District Council kin sa pan jingkheiñ jingdiah ka ba beit thik pa thik na ka Sorkar jylla halor ka bhah na ka khajna ka ba ju ïoh na ka minor Mineral, major mineral bad ka khajna na ka Motor Vehicle Tax.
Ha ba kren sha ki ladpathai khubor, hadien ka jingïalang jong ki laitylli ki District Council ka ba kynthup ïa ka KHADC, ka JHADC bad ka GHADC, u Bah Titosstarwell Chyne u la ong, ha ka ne ka jingïalang la ïakren halor ka pla tyngka jong ki laitylli ki District Council ki ba dei ban ïoh na ka Sorkar jylla.
“Kane ka bhah ka kynthup na ka jinglum khajna na u minor mineral, major mineral bad Motor Vehicle Tax, kaba ki District Council ki ju ïoh na ka sorkar jylla hynrei kim tip katno ka jingkheiñ ka ba ki dei ban bhah pisa sha ki, namar kumba ka long mynta hi ka Sorkar ka ju ai kyllum ïa kane ka pisa, kumta ngi kyntu ïa ka sorkar jylla ba kan dei ban ai da ka jingkheiñ ka ba biang halor kane”, u la ong.
U la bynrap shuh shuh, “Ngi kwah ruh ban kyntu ïa ka sorkar jylla ba kan pynïoh kham bun ka pisa na ki skhim na ka bynta ki lai tylli ki District Council, ki ba kynthup kum ïa ka plan skhim bad kiwei kiwei ki jingïarap pisa”.
U Bah Titos u la ong ruh ba ha kane ka jingïalang la ïakren ruh halor ka jingpynslem jong ka sorkar ban pynlait ïa ka pisa ka ba wan na ka 15th Finance Commission ka ba ju ïoh na ka Sorkar Pdeng bad ban pynlait ruh ïa ka pisa ha ka por ba biang namar ba sahkut lut ki kam pynroi”.
U la ïathuh, “Ki lai tylli ki District Council ki khlem ïoh shuh ruh ïa ka song pisa ka ba dei na ka Untied Skhim, jong u snem 2021 haduh u snem 2023 bad kane ka long na ka jingpan ka sorkar pdeng ïa ka UC, bad ka jingpynslem ki District Council ban ai ka long namar ngim ïoh ïa ka pisa ha ka por ba biang, kumta ngim lah ban pynbiang por ïa ka UC”.
U Bah Titos u la kdew ruh ba ki District Council ki pyrshah jur ruh ïa ka jingthmu ban pyntreikam ïa ka Swamitav Skhim da ka sorkar pdeng namar ba ka rukom bat khyndew ha ka jylla ka long ka ba pher na ki wei ki jylla bad ka jylla ka don la ka jong ka riti dustur bad ka rukom bat khyndew.
“Ki Council, kin sa dawa noh ruh ïa ka sorkar ban pynkhamti biang sha ki ïa ka bor ba kin lah ban ai Schedules Tribe Certificate. Ka ba ïa kane la knieh noh da ka sorkar. Halor ka PRC ki District Council kin sa dawa ba ki bor ditrict ki dei ban ïoh jingbit shwa na ki ADC shwa ba kin pynlait ïaka PRC”, u la bynrap.
