NONGSTOIÑ:
Ki san tylli ki kynhun Sengbhalang ba kynthup ïa ka Seng HYC, HANM, CoRP, ENJC bad ka JSM kiba hap hapoh ka shatri jong ka Save Hynniewtrep Mission, mynta ka sngi ka 2 tarik u Nohprah kila pynlong da ka jingïaïaid paidbah ha Riangdo WKHD ban dawa na ka sorkar ba kan pyntreikam noh ïa ki 9 tylli ki mat jingdawa ba ka kynhun kala ïai dawa.
Ïa katei ka jingïaïaid paidbah la sdang na Zero Point ter ter haduh ban da poi ha ïew Riangdo ha kaba la wan ban ïashim bynta lang ruh da ki heh nongïalam ka HYC Sengkmie bad kiwei kiwei de ki nongïalam jong kitei ki kynhun kiba la ïa pyrta jam ban pyntreikam noh ïa kitei ki mat khamtam ïa ka ILP.
Hadien katei ka jingïaid paidbah la bteng pat sa ka jingïalang hapoh ïew Riangdo ha kaba ki nongkren na ki kynhun jong kitei ki san Seng kila pynshai halor kitei ki 9 tylli ki mat jingdawa.
U General Secretary ka Seng HYC haba ai jingkren ha katei kajingïalang u la ong ba ngi dawa ILP namar ngim kwah ban long mynder hala ka jong ka Ri hynrei kaba sngewsih ka long wat hadien ba ka ïing bishar kala dep ban pass ïa ka resolution mynta la 3 snem khlem pat lah ban pyntreikam ïa ka ILP ha ka Jylla.
Shuh shuh u la ong ruh ba ka sorkar kala pynbna ban buh noh ïa ki Border Out Post ha manla ki jaka khappud ba don ki jingïakajia hynrei katei ka jingthmu buh BOP ka sorkar Jylla kam don jingmut namar kam nud ban leit buh ha ki jaka ba ïa kajia pud hynrei ka thmu pynban ban buh ha pdeng shnong ban pyntieng pynsmiej ïa ki paidbah nongshong shnong.
“Haba phi buh ïa ka Outpost dei ruh ban ai ïa ki pulit kiba biang bad ai ruh ïa ki suloi ha ryngkat u kuli bad ka bor ban siat lada donkam ban ïada ïa u paradoh parasnam bad ka jingjia kaba la jia ha Mukroh kamdei shuh ban dang jia ha kaba ki pulit Meghalaya ki khlem nud ban pynphai ban siat ïa ki pulit Assam namar khlem ïoh hukum” ong u bah Synrem.
Katba na ka liang jong u Samla Lumang Kharsyiemlieh President ka HYC, WKHD haba ai jingkren ha katei ka jingïalang u la ong ba ha kiwei ki Jylla ban ïoh ïa ki Police Outpost ka shong ha ka jingstad jong ki nongïalam katba ha ka Jylla ka jong ngi hap ban duh shwa ïa ki mynsiem briew ba kordor ngin sa ïoh ïa ki BOP.
Na ka liang jong u nongïalam ka HANM na WKHD u samla Wilstone Sohshang u la ong ngi sngewsih ba ngi ïoh ïa u DGP u bym dei u nong Meghalaya bad jin lada u dei u nong Meghalaya u la dei ban leit ïaid kjat sha Mukroh bad sha baroh ki jaka khappud ba don ki jingïakajia.
U bah Sambormi Lyngdoh president ka EJNC ka wei na ki kynhun kaba hap hapoh ka lama jong ka Save Hynñiewtrep Mission u la ong ba balei ka jaitbynriew ka tlot haduh katta katta kadaw ka dei namar hapoh secretariat la dap sa tang kita ki nongkhaïi bad ki heh Saipan.
U la ong ruh ba kam myntoi lada ngi ïoh ïa ka roi ka par lada ngi duh noh ïa ka khynndew ka shyiap. Shuh shuh u la kyntu ruh ïa ki paidbah da kaba ong ba “Kum ki paidbah haba ngi jied ïa ki nongmih khmat jied ïa ki nongmihkhmat kiba don shisha ka khmat ki ban ïohi jngai na kabynta ka ri bad ka jaitbynriew”.
