MUMBAI:
U “Uranium”, u mar poh khyndew ba la bna nam tam ha ki thaiñ ri lum Khasi – Jaiñtia u la pynktik ïa ki jingmut jingpyrkhat jong kiba bun ba lang ha kaba la ïoh ïa ka jingtyrwa na ki ba bun ki kynhun ban tih bad pyndonkam ïa une u mar poh khyndew.
Halor kane, ka la bsuh ha ki jingmut jong u Bah Dominic Savio Diengdoh na ka “T7 News” bad u Tridip K Mandal na ka “The Quint” ban pynmih noh da ka phlim halor ka jingpyrshah ban tih ïa une u mar poh khyndew kata u “Uranium”.
Kumjuh ruh, hadien ka jingwan ka khlam Covid 19, ka Mumbai Press Club ka la ïoh ban pynlong biang ïa ka RedInk Award 2022 ha NCPA, Marine Drive ha ka 16 tarik Nohprah ha kaba la ai ruh ïa ki khusnam na ka bynta ki khubor bad ki nongthoh batbit jong ka Ri India, ha kaba u Bah Dominic Savio Diengdoh bad u Tridip K. Mandal ki la ïoh ban rah ïa kane ka khusnam ha ka Environment Category (TV).
La ai kyrteng ïa kane ka phlim da ka “The price of saying No” – How a village in Meghalaya fought against Uranium Mining ba la pynmih da ka The Quint bad la pynbit pynbiang u Bah Diengdoh bad ka kynhun T7 News.
Ha kane ka category la shah jied haduh san ngut na kylleng ka Ri bad la ïoh rah pat ïa ka khusnam da katei ka phlim. Shuh shuh kiba la ïoh ban khur bun tylli ki khusnam ki dei na ka BBC News.
