SHILLONG:
Hadien ba u myntri ka Social Welfare, u Bah Paul Lyngdoh u la weng noh ïa ka Kong Phidalia Toi kum ka Chairperson jong ka Women Commission namar ka jingbymshimkhia ïa ka kam, na ka liang u myntri u la pyntip ba yndon da ka Search Committee ban wad ïa ka Chairperson bathymmai jong ka Women Commission.
Halor kane ka jingshah weng na ka liang ka Kong Phidalia kam sngew ïahap ïa ka jingleh u myntri bad ong ba ka dei ka jingshun ïa ka shimet. Hynrei na ka liang u Bah Paul u la ong ba kane kam dei ka jingshem daw shimet hynrei ka dei beit katkum ka jingleh jong ka, da kaba ïashim bynta ha ka jingïalang ka seng sainpyrthei bad ka jingpep jong ka haduh 12 tylli ki jingïalang khlem da kitkhia ïa ka kam kaba ka bat.
Haba kren bad ki nongthoh khubor mynta ka 30 tarik Jylliew, u Bah Paul u la ong, “Kam shym la shimkhia ïa la ka kam ban pynlong jingïalang, pynban ka la pep ha ki 12 tylli ki jingïalang jong ka Commission bad ka don ruh ka jingjia ba la saphriang ka jingring dur ba ka ïashim bynta ha ka jingïalang jong ka seng sainpyrthei”.
U Bah Paul u la ong ruh ba shisien ba la shimti ïa ka kam kum ka Chairperson jong ka Commission dei ban kiar laimaw laidieng na ka kam politik, hynrei ka Kong Phidalia kam kheiñ snep ïa kine pynban ka la pep ruh ha ki 12 tylli ki jingïalang da kaba aidaw ba ka shitom. “Ka briew kaba khlieh ïa ka Commission, kaba peit ïa ka lawei jong baroh ki kynthei hapoh Meghalaya”, la bynrap u Bah Paul.
U Bah Paul u la pynshai ba ka jingshimrai pyrshah ïa ka ka dei halor kine ki daw bad kam shym la don kano kano ka daw shimet. “Mynta ngin ïaid sha khmat bad nga la rai ban thaw da ka Search Committee kaba kynthup ïa ki official bad non official member. Ki official member kin long ki heh ophisar jong ka sorkar jylla bad ki non official member kin long ki principal jong ka Lady Keane College bad Women’s College”, la ïathuh shuh shuh u Bah Paul.
