SHILLONG:
Ka kynhun jong ka Election Commission ka Ri India (ECI) ka la ïakynduh ïa ki nongmihkhmat na ki seng saiñ pyrthei bapher bapher ka jylla Meghalaya ha ki ar sngi kata ha ka 12 bad 13 tarik Kyllalyngkot, ban twad jingmut bad ban sngap ïa ki jingeh bad ki jingkhuslai jong ki. Ka ECI ka la ïakynduh ruh ïa ki ophisar jong ka jylla halor ka jingpynkhreh na ka bynta ka elekshon ka ban wan.
U Chief Election Commissioner jong ka Ri India u Rajiv Kumar u la ong, “Nga kyntu ïa ki nongshong shnong jong ka jylla Meghalaya ba kin ïashim bynta shitrhem ha kane ka elekshon kaban wan kum ha ki sngi jingrakhe kmen. Ka Meghalaya ka long ka jylla kaba shong suk shong saiñ bad la ju pynlong ïa ki elekshon kum ka jingrakhe ïa ka hok ki paidbah lane ka democracy.”
U Kumar u la ïathuh ruh ba ka jingbun paid ha ka jylla ka long 29,66,889 ngut, ha kaba ka jingdon ki shynrang bad ki kynthei ka la jan mar ïa ryngkat. Ka samoi jong ka Ïingdorbar Thawaiñ ka jylla Meghalaya kan kut noh ha ka 15 tarik Lber 2023 bad ka jingpynkhreh na ka bynta ka jingjied ïa ki nongmihkhmat ba thymmai, yn pyndep ha shwa ban kut ka samoi.
Ki jingkdew harum:
1. Ka jingdon ki nongthep vote kynthei ka kham bun ban ïa ki shynrang ha kaba ki don 10,92,326 ngut ki nongthep vote kynthei ha ka jylla.
2. Ki don 7,478 ngut ki nongthep vote kiba don jingduna ha ki dkhot met lane ki Persons with Disabilities (PWD).
3. Ki don 22,858 ngut ki nongthep vote kiba 80 snem tam ka rta, 290 ngut ki nongthep vote kiba la palat 100 snem ka rta bad 81,443 ngut ki nongthep vote kiba 18-19 snem ka rta.
4. Ki don 3,482 tylli ki polling station, ha kaba 3,157 tylli ki polling station ki don ha ki jaka kyndong. Ki don 120 tylli ki polling booth na ka bynta ki kynthei, 60 tylli ki polling booth ba pynïaid ki samla bad 1,741 tylli ki polling station ki ban sa pyni ha ka web.
5. Ki nongthep vote kiba don jingduna ha ki dkhot met lane ki Persons with Disabilities (PWD) ki lah ban download ïa ka Saksham app, state icon – Light After Dark band.
6. Ban khring ïa ki samla bad ïa kiba don ha ki jaka sor, ka Commission bad u Chief Election Officer (CEO) ka Meghalaya ki la ïit ïa ki polling station ha man la ki konstitwensi ba duna kiba wan thep vote, kaba kot 300 tylli.
7. Ki nongshong shnong ki lah ban ujor ïa kino kino ki jingujor lyngba ka C Vigil app kaba pynkup bor ïa ki nongshong shnong.
8. Ki nongshong shnong ki lah ban tip la ki kyrtong elekshon ki don dak sniew (criminal background) ne em lyngba ka Know Your Candidate app.
