MAWKYRWAT :
Ki bahaïing hasem jong u bah (L) Maniwell Jahrin mynta ka sngi ki la pynlong ïa ka sngi ba kyrpang, ba la tip kum ka “Maniwell Jahrin Academy Excellence Award 2022”, ha Multipurpose Hall DC ophis, ban sam khusnam sha ki samla kiba wan shakhmat ha ki kyrdan pule kiba don hapoh jong ka South West Khasi Hills District. U bah Thomas A Sangma uba dei u Chief Advisor ïa u myntri rangbah ka sorkar jylla, u Conrad Sangma, u la long kum u kongsan ha kane ka sngi.
Na ka liang kiba haïing hasem jong u bah (L) Maniwell Jahrin ki ju pynlong kum ïa kane ka Maniwell Jahrin Academy Excellence Award, man la u snem kum shibynta ban ai ka burom bad ai mynsiem shuh shuh ïa ki samla pule kiba wan shakhmat ha ki kyrdan pule bapher bapher ban ai mynsiem shuh shuh ïa ki; ba nalor ba ka jingstad ba ki don; kaba kongsan ka long ba kin tip ruh U Blei.
U bah Thomas A. Sangma haba kren kum u kongsan u la pynpaw ka jingsngewnguh ïa kiba haïing hasem jong u bah (L) Maniwell Jahrin bad ong ba kane ka dei ka bynta kaba kongsan tam na ka bynta ki samla pule. “Ngi kum ki briew wat lada ngi stad katno katno ruh, khlem u Blei ngim long ei ei. Kum ki khynnah skul haba ngi don ha ki jingpule ngim dei ban sngew ba ka jingstad ka don ha ki hynrei khlem U Blei uba ai ngim lah leh ei ei,” la ong u Bah Thomas. Kumta u la kyntu ïa ki smala pule ba ki dei ban wad ïa ka jingtip ym tang ha kaba ïadei bad ka jingstad pyrthei. U la ong ba ngi dei ban tip ruh ïa u Blei ‘khnang ba ka jingim bad ka lawei jong ngi kan long ka jingkyrkhu bad kan bha ha baroh ki liang’.
Ki khynnah pule kiba la ïoh pdiang ïa ka khusnam ha ryngkat ka ka song pisa, ki long u Damebanhun Thongni, ka Maphashisha Dkhar, ka Ilawanshwa Nongsiej, ka Eurika K Wanniang bad ka Dahunshisha Lyngkhoi.La pynïaid ïa ka jingïalang da ka Kong Pearly Syiem Marak bad ka jingduwai na ka Kong Rosamund Syiem.
La ïoh ruh ka jingkren na ka Kong C. Kharkongor kaba long ka D.C. South West Khasi Hills District, ha ryngkat ka jingïadonlang ruh ki bahaïing hasem jong u Bah Maniwell Jahrin bad ki khynnah skul. La pynshit pynshngaiñ shuh shuh ïa kane ka sngi da ka jingrwai na ka Larisha Suting bad na ka Ilawanshwa Nongsiej bad ka jingduwai na u Pastor, Timothy G. G. Momin.
