SHILLONG:
Ki Nongïalam ka Khun Hynñiewtrep National Awakening Movement (K.H.N.A.M) ha ka 20 Ïaïong ki la leit ban sam da ki kot lyngkdop ha ki kolej bad ki jaka paidbah ban pynsngew thuh halor ka jingpynduh noh ïa ka Personal Interview ha ka jingthep kam sorkar ha ki Group B, C bad D.
Haba ïakren bad u President ka KHNAM youth wing u Bah Thomas Passah u la ïathuh ba ka seng naduh u snem ba la dep ka la thoh sha ka sorkar jylla ban shim ïa ki juh ki sien jam bad ban weng noh ïa ka personal interview na Meghalaya.
U la bynrap ruh da kaba ong ba dang shen kila thoh bad dawa biang na kane ka sorkar MDA-2. Hynrei ki ïohi ba ka don ka jingshim sting jong ka sorkar. Kane kam dei ka mat jong ka KHNAM marwei, hynrei ka dei ka jingdonkam na ka bynta ka lawei ki samla ka Ri.
“Ngi ïohi la bun ki samla ki la duh jingkyrmen wat ban thep kam sorkar ruh, namar kata, ngin hap ban leh ei ei ngim lah ban shu peit kai ïa ka jingduh jingkyrmen ki samla ka Ri,” u la ong.
U la bynrap da kaba ong ha kane ka juk mynta ban ïoh kam ka suk ban jan sha ki politician ban ïa ka jingnang jingstad. Kane ka rukom hap ban pynkylla bad ki paidbah ki dei ban sngewthuh shai ïa kane ka jingdawa jong ki.
“ Lada kane ka urlong kan long ka jingmyntoi ïa ki samla ki jong ngi,” u la ong.
U la bynrap ruh da kaba ong ba ka jingsam ïa ki kot lyngkdop ka long ban pynsngewthuh paidbah ïa ka jingdonkam jong kane ka mat bad ban pynthikna ïa ka rukom thep kam kaba khuid. Lada ngi ïohi ba ka sorkar ka ïai leh mynthi, ka seng kan khot da ka jingïalang paidbah ka baheh. Bad lada ka sorkar kam shim khia ïa kane ka kam ka seng kan sa shim da ki wei pat ki lynti ban pynurlong.
