NEW DELHI:
Da ki lak ngut ki briew kaba la kot sha ka 1,15,161 (shi lak khatsan hajar shispah hynriew phew wei) ngut ki briew kiba la leitjngoh ïa ka Pradhanmantri Sangrahalaya kaba don ha Teen Murti Road, New Delhi haduh ka 30 tarik u Nailur.
Ha ka 15 tarik u Risaw 2022, ki la don 3,233 ngut ki briew kiba la leit sha ka museum tang ha kajuh ka sngi kaba la lah ban thaw record ha ka pyrthei. La plié paidbah ïa ka Sangrahalaya ha ka 21 tarik u Ïaiong 2022.Ka Pradhanmantri Sangrahalaya ka dei ka museum ba la tei kum ka jingburom ïa baroh ki Myntri Rangbah duh ka ri India naduh ba ka ri ka la ïoh laitluid, bad ka don ruh ka jingpynpaw ba kumno uwei pa uwei u la noh synñiang halor ka roi ka par jong ka ri.
Ki nongialam jong ka ri kum ka President, Vice President, Myntri Rangbah Duh, Myntri ba dei khmih ïa ka tnat kam pohiing bad kiwei kiwei ki Myntri ka Sorkar Pdeng, ki Myntri Rangbah jong ki jylla, ki dkhot ka ïing bishar, ki nongmihkhmat na kiwei kiwei ki ri bad kiwei kiwei ki heh ki haiñ ki la leitjngoh ïa ka Sangrahalaya.
Katto katne ki jingkren da ki nongïalam ki la khring ïa ki nongleit jngohkai ha katei ka museum :
U Ram NathKovind, President barim u la ong “Kane ka Pradhanmantri Sangrahalaya kaba la saiñdur kyrpang ka dei ka jingbuh jingkynmaw ïa ki kam jong ki Myntri Rangbah Duh kiba rim bad ki nongïalam jong ka ri, bad ka dei ka jaka ba lah ban ïohi ïa ka jingïaid shaphrang jong ka India kaba la ïoh jinglaitluid”.
U M. Venkaiah Naidu, Vice-President barim jong ka India u la ong “Ka pyni bad ai burom ruh ïa ka jingïar jong ki nongïalam ka ri bad ka ai ïa ka khubor jong ka jingïatylli kaba long kongsan bha ha ka synshar paidbah kum ka ri jong ngi”.
U Narendra Modi, Myntri Rangbah Duh u la ong “Mano mano ba leit sha ka Pradhanmantri Sangrahalaya kin kham sngewthuh bha ïa ka jingkhraw jong ka synshar paidbah ka India, ka jingïar jong ka bad ka jingplie lad”.
Ka Sangrahalaya ka pyni ïa ka histori jong ka India hadien ba ka la ïoh jinglaitluid. Ka jingïakhleh jong ka teknoloji katkum ka juk mynta bad ki mar hyndai ka wallam ka jingsngew-tynnad na ka bynta baroh.
Ka jingpyndonkam ïa ka augmented reality bad virtual reality ka la khring bad jingitynnad bad ka jingsngewtynnad haba ïohi ïa ki kam ba pyni ha kane ka jaka. Kane ka sienjam ka thmu ruh ban ai jingtip ïa ki heprit shaphang ka jingïalam lynti jong baroh ki Myntri Rangbah Duh kiba rim.
Ki don bun ki jaka ai jinghikai kiba la ïalam ïa la ki khynnah pule sha ka Sangrahalaya. Ha ka 15 tarik u Risaw 2022, 2044 ngut ki khynnah pule na 10 tylli ki skul ki la leit sha kane ka jaka.Ha katei museum ki don ruh ki briew kiba ïalam ban pyni lynti bad ai jingbatai kiba long ki briew kiba trei ha ka Sangrahalaya ban ai jingtip khamtam na ka bynta ki kynhun skul. Kito kiba la wan na ka Children’s Academy, Ghaziabad ki la thoh, “Ka jingdon ki nongïalam bad nongbatai ka long kaba sngewtynnad bha. Nga la ïoh jingtip shibun shaphang ki Myntri Rangbah Duh ka ri. Ngi ïohi ruh ka jingitynnad ka jingdon ki tiar ha kane ka Museum.”
Mynta dang shna ia ka gallery shaphang u Myntri Rangbah Duh mynta, u Narendra Modi ha ka Sangrahalaya. La pynkhreh ruh ban pynlong ïa ki Quarterly Lecture Series da ki riewshemphang bad ki nongïalam shaphang ka jingim bad ki kam jong ki Myntri Rangbah Duh. Yn pyni ruh ïa ki mar ba kyrpang ha kine ki por. Kaba nyngkong kan long shaphang u Atal Bihari Vajpayee da u Ram Nath Kovind, u President barim jong ka India.
