NONGPOH:
Ki pulit ka Ri Bhoi ha ka 24 tarik Jylliew ki la pynlong ïa ka jingïaid paidbah da ki thuk thuk na Nongpoh sha Umiam bad phai biang sha Nongpoh, ban pyntip paidbah halor ka jingktah u drok ha ka distrik. U Deputy Commissioner ka Ri-Bhoi District u la kaweh lama ban sdang ïa kane ka jingïaid paidbah da ki thuk thuk, ha ryngkat ka jingïadonlang u Addl. Superintendent of Police Ri Bhoi u Bah B Diengngam, ki ophisar, ki nongñiah thuk thuk bad kiwei kiwei.
Ha kane ka jingïaid paidbah da ki thuk thuk, la pynlong ïa ka prokram pyntip paidbah ha Nongpoh, Umsning bad Umiam, ha kaba la ïashim bynta kiba bun ki samla na Ri Bhoi ryngkat ki pulit ka Ri Bhoi ban pyntip paidbah ïa ka jingktah ba sniew u drok.
Ki nongïashim bynta ki la sangeh haman ki jaka pynïeng kali kum ha Nongpoh, Umsning bad Umiam ryngkat ka jingkyntu ba ki dei ban buh ïa ki prokram barit ban pashat ïa ka jingstad bad jingtip haba ïadei bad ka jingpyn donkam bakla ïa u drok.
Ryngkat ka jingshim bynta jong ki pulit ha kane ka jingïaid paidbah, ki samla na kylleng ki jaka jong ka Ri Bhoi distrik ruh ki la snoh kti ha kane ka prokram.
Ha shwa ban sdang ïa kane ka jingïaid paidbah, u Deputy Commissioner ka Ri Bhoi u la ai ka jingïaroh ïa ki pulit ka Ri Bhoi ba ki ïaleh ban pynduna ïa ka jingkynrei u drok ha ka imlang sahlang.
Shuh shuh na ka liang u additional SP ka Ri Bhoi, u Bah B. Diengngan u la ong ba ki pulit ki la ïoh ban register shibun ki jingjia ba ïadei bad u drok bad ki pyrshang katba lah ban ïaleh pyrshah ïa kane ka jingeh ryngkat ka jingkyrshan na ka dorbar shnong bapher bapher.
U la kyrpad ruh ïa ki dorbar shnong ban long kiba adkar haba ki bat ïa ki nongkhaïi bad ki nongdih drok, bad ki la kyntu ba kim dei ban wad drok ha ka met jong ki runar namar kane kan ktah ïa ka jingtohkit bad pyntlot noh ïa ka case ynda lapoi ha ïing bishar.
“Lada ka Dorbar Shnong lane ki Village Defence Party ki ïoh jingtip halor ki nongkhaïi bad nongdih drok, ki lah ban pyntip sha ki bor pulit khnang ba ka kynhun ANTF (Anti Narcotic Task Force) ka lah ban leh ïa baroh ki jingdonkam,” u la ong.
