SHILLONG:
U Working President ka People’s Democratic Front (PDF) u Bah Banteidor Lyngdoh uba dei ruh u Myntri ka sorkar jylla u la pynpaw ba ka la don kam ïa ki paidbah khappud ban ïoh jinghikai na ka liang ka tnad Home Guard ne ka tnat Pulit ban pyndonkam tiar siat, bad ban pyndonkam da ki suloi kiba don license ban ïada ïalade.
“Ban ai suloi kam mut sha baroh ki paidbah hynrei sha ki Village Defence Party (VDP) kiba man la ka shnong ki don, ki donkam ban shah hikai da ki tiar siat katba ki lah ban leh katkum ka aiñ ban ïada ïalade,” u la ong.
U la bynrap ruh da kaba ong, “Ngi ïeng skhem na ka bynta ka ri bad ka jaitbynriew, ban ïada ïa ka khyndew ka shyiap kaba longtrai da ma ngi. Ngim lah ban shu ïapeiñ kumne namar kan ktah ïa ka jylla baroh kawei.”
U la ïathuh ruh ba ha ka jingïathuh jong u Waheh Shnong ha kato ka por ba ki siat ki pulit Assam ki la mareh bad ki don ki pulit Meghalaya kiba mareh lang bad phet, haba ki paidbah ki ong ban pynphai kine ki pulit ki ong ba ki khlem ïoh hukum najrong kim nud ban siat.
“U briew u la wan haduh ha ïing ban pynïap ïa phi hap ap hukum mo, hap ban ïada ïalade, ka kam pulit ka dei ban long kumta. Kane ka jingleh ka pynpaw ba kim long kiba biang ban trei ïa ka kam,” u la bynrap.
“Ngin hap ban ïa kren ïa kane bad u Myntri Rangbah, kiei kito ki pulit kiba don ha kato ka sngi kiba phet bad u paidbah, kine kim long kiba biang ban trei ai ha kiwei kiba biang ba kin trei, lada don ki briew kiba ïeid ïa ka ri bad ka jaitbynriew ki la pynphai bad ki pulit Assam ruh kila lah ban khyllem”, u la ong.
U la ïathuh ruh ba ki paidbah ki shong syier, ki nongshong shnong ki pynsngew ba kum kine ki jingjia ban pyntieng bad pyndik ka jia na ka por sha ka por. Ka seng kan sa ai da ka jingthoh sha u Myntri Rangbah ban dawa ban peit ïa ka jingeh kaba ki paidbah ki ïa kynduh ha ki khappud bad ban buh noh mardor ïa ka police outpost ha Mukroh, ym ha Barato.
Na ka liang u MLA ka Sohra, u Bah Gavin Miguel Mylliem u la pynpaw ka jingsngewsih bad pynrem jur haba ïadei bad ka jingshah siat ïap jong ki san ngut ki nongshong shnong ka Mukroh ha ki pulit Assam.
“Long katba long, ban shim ïa ka jingim briew kam long ka lynti kaba dei,” u la ong.
Shuh shuh u Bah Gavin u la ong ba ka jingjia ha Mukroh kan pynslem ïa ka jingpynbeit ïa u pud u sam ha ka bynta kaba ar lane ka phase-II, bad kane kan ktah ïa ka jylla.
U la ong ruh ba ka sorkar Meghalaya kam dei ban pyndem hakhmat jong ka sorkar Assam, hynrei kadei ban pyn-eh bad long dukhi.
