SHILLONG:
Ka Meghalaya High Court, myn ha ka 20 tarik, Naiwieng, ka la khmih bniah ba ym don kano kano ka jingïarap ban lait na ka jingdheng kali hapoh ka jylla, watla shim ïa ki lynti, ba kynthup ïa ka jingdon bynta jong ka kynhun ba la tbit ban teh lakam ïa ka jingdheng kali hapoh sor Shillong.
Haba la sngap ïa ka PIL halor kane ka mat, ha ka miej ba kynthup ïa u Chief Justice (Acting) HS Thangkhiew bad u Justice W Diengdoh, ki la ong kumne, “La ïohpdiang da ka jingpynbna da ka ïing kashari kaba la bun ki kaiphod ba la dep ujor lem bad ka jingïadei halor ka jingdheng kali bad ki lynti ba la dep shim, ba kynthup ïa ka jingdon bynta jong ki katto katne ki kynhun ban teh lakam ïa ka jingdheng kali.”
“Hynrei, ka jinglong jingman kumba ju long hapoh ka jylla, ka la i kumba la eh ban pynbiang ïa ka jingdheng kali. Haba peit halor kane ka mat, hadien ba la dep ujor da ka affidavit da ki nongkyrpad, ïa katei ka mat, yn sa shimkhia na ka bynta ban khmih bniah,” ong na ka liang ka ïing kashari.
Na la liang jong ka miej ki Justice, ki la ong ba la dep peit ba ïa ki kyrteng jong ki katto katne ki briew, la dep phah da u senior counsel na ka bynta katei ka jingkyrpad ka ban dei ban khmih bniah bad kaba long da ki dkhot jong ka Decongestion Committee, ha kaba ïa kajuh ka mat, la thmu ban shimkhia lang bad yn sa pynsngap biang ha ka 1 tarik, Nohprah.
