SHILLONG:
U Myntri Rangbah ka jylla, u Conrad K Sangma haba kren halor ka Uniform Civil Code (UCC), u la pynpaw ïa ka jingsngew kum u nongïalam ka National People’s Party (NPP) ba ka party kan ym lah ban pdiang ïa kane.
Haba kren ha ki lad pathai khubor u Conrad u la ong ba kum ka party, ka la long ka ba shai ba ka UCC ka dei kaei kaei ka bymlah ban pdiang, watla kane ka Bill ka dei ka Private Member Bill bad kam dei ka Bill bala wanrah da ka Sorkar kumta kam pat da shai bha ïa ka jingwanrah ïa kane ka Bill.
U Conrad u la kubur ruh ba ka rukom long ka UCC, kan lah ban ktah jur ïa ki riti ki dustur bad kumjuh ïa ka rukom im jong ki ritpaid riewlum na ka thaiñ shatei lammihngi khamtam hapdeng ki jaidbynriew ba ai jait sha ka kmie kum ha jylla Meghalaya.
“Ki lah ban don ki bynta kiba na ka liang ka Sorkar Pdeng ka kwah ban pynbha, hynrei ki don katto katne ki jingsngewkhia ïa kiba ngim pat da shai hynrei kaei kaba ki thmu ban pyntreikam kam dei ban ka ktah ïa ka riti dustur bad ïa ka rukom im jong ki nongshong shnong ka Meghalaya,” u la ong.
U la bynrap shuh shuh “Kat kum ka UCC ka kdew tang halor ka nongkynti ki kmie ki kpa dei ban hiar pateng sha ki khun, bad lada ka UCC ka ong ba ki nongkynti kin hap leit sha ki khun shynrang ba nyngkong kumba long ha kiwei pat ki bynta jong ka Ri, kane kam ïahap namar ba katkum ka dustur ki jaidbynriew riewlum ki ai pateng sha ki khun kynthei khatduh”.
U Myntri Rangbah u la ong ba ka ym pat lah ban ong eiei bha halor kane namar kane kam pat shai bha bad ka long ka ba donkam ban dang hap ban ïatai bha halor kine ki kyndon ki ba don ha ka Bill bad ki donkam ban hap ïatai bniah namar ba ngim tip bha halor kane ka Bill.
Haba ïadei pat bad u pud u sam ka jylla, u Myntri Rangbah ka jylla u Conrad Sangma u la ong ba ka sorkar kan bteng ban ïakren halor ka jingpynbeit ïa u pud u sam haduh bakut.
U la ong kaei kaba la jia ha ka Shnong Mukroh, ka la long u maw jynthud bad kam mut pat ba ngin pynkut noh ïa ka jingïakren.
Ka Supreme Court ka la pynsangeh ïa ka jingbthah jong ka High Court haba ïa dei bad ka jingpyntrei kam ïa ka Memorandum of Understanding (MoU) hapdeng ka jylla Assam bad Meghalaya haba ïa dei bad ka jingphiah bad ban pynïeng ïa ki païa hapdeng kine ki artylli ki jylla.
Ula pynkynmaw ba u la dep ong ba ka sorkar kan sa leit sha Supreme Court bad kumba ki pyrkhat ka Supreme Court ka la pynsangeh ïa ka.
