SHILLONG:
U Symbud Myntri Rangbah ka jylla u ba dei ruh u Myntri ba dei khmih ïa ka Public Work Department (PWD), haba kren ha ka Ïing dorbar thawaiñ ka jylla ha ka 21 tarik Lber u la ong ba ka jinglong jingman jong ka surok four-lane ba wan na Umshyrpi sha Baniun ka dang don hapdeng ka jingphah biang ïa ka tender hadien ba ka kompani ba la shim kam ka la ieh noh shiteng ïa ka kam khlem pyndep.
Ïa kane u Bah Tynsong u la jubab halor ki jingkylli ba la buh da u MLA ka Mylliem Konstitwensi, u Bah Ronnie V Lyngdoh haba u dang kren ha ka samoi buh jingkylli jong ka sngi kaba ar jong ka dorbar mang tyngka.
U Myntri ka tnad PWD u la ïathuh ïa ka ïingdorbar thawaiñ ba ka jingtrei ïa kane ka surok na Baniun sha Dawki hapoh ka Package II ka long 37.75 per cent, hapoh ka Package III ki dang ap ïa ka kaiphod ba kham bniah lane ka Detailed Project Report (DPR), ka jingtrei hapoh ka Package IV ka long 30.10 per cent bad hapoh ka Package V ka jingai biang ïa ka tender ka la poi ha ka bynta kaba kut.
U Bah Tynsong u la ong ruh, “Ka kompeni kaba ka tnad ka la aiti ïa ka kam hapoh ka National Highways and Infrastructure Development Corporation (NHIDCL) ka la ieh noh shiteng ïa ka jingtrei bad nga kynmaw ka dei ha u Lber/ Ïaïong 2022, nga la leit sha Delhi bad kynduh ïa u MD bad Secretary jong ka tnad ba dei khmih ban ïakren bad pynpaw ïa kine ki mat ha kaba ki la rai ba dei ban sdang noh ban phah biang ïa ka tender”.
Shuh shuh u la bynrap da kaba ong ba hadien ba la pynïaid shakhmat ïa ka kam, tang kawei ka kompeni ka la ïashim bynta, namar kata la phah biang ïa ka tender ban sdang biang ïa ka kam bad u la ong ruh “hapoh u nai Ïaïong, yn pyndep ïa ka jingpynbiang bad lah ban sdang biang ïa ka kam. Ki la don katto katne ki jingïalang ha ka kyrdang jong nga bad ha ka kyrdan u Chief Secretary ban khmih bad peit bniah ban pynthikna ba ka jingpynpoi lut ïa ki tiar ban trei yn pyndep hapoh ka 15 tarik Ïaïong”.
“Ka jingtrei hapoh ka Package III ka la sah kut namar ka jingpyrshah ki trai jaka bad ki nongïalam shnong ïa kane ka projek, hynrei mynta la lah ban pynbeit ïa kita baroh bad ka NHIDCL ka dang pynkhreh ïa ka DPR,” u la ong.
Hashwa kane, u MLA ka Mylliem u Bah Ronnie V Lyngdoh u la ong ba ka jingpynslem ïa ka jingtrei ïa kane ka surok ka la pynthut ïa ka jingïaid beit ki kali kaba la wanrah jingeh ïa ki paidbah bad ki nongleit nongwan.
Ha ka jingkylli kaba bud, u Bah Lyngdoh u la kylli ruh halor ka jingtrei ïa ka western bypass kaba la pyntrei ryngkat bad ka projek four-lane. U la ong ba lada ka jingtrei ïa ka projek four-lane ka shim por, ka sorkar ka la dei ban shim ïa ka projek bypass kum ka mat kaba kongsan khnang ban pynsuk ïa ki jingeh kiba ki paidbah ki ïakynduh.
Haba jubab halor kane, u Bah Tynsong u la ïathuh ba ka Western Bypass kaba poi shaduh Pynursla, kaba dei ruh ka konstitwensi jong u, ka dang don ha ka bynta ban ïoh ïa ki jaka.
“Ngi la poi ha ka Section 19 jong ka Land Acquisition Act bad nga ngeit ba lada baroh kiei kiei ki ïaid beit, hapoh ar ne lai bnai ngin lah ban aiti ïa ka jaka sha ka kompani ba trei khnang ba ki lah ban sdang noh ïa ka kam,” u la bynrap.
Ha kawei pat ka liang, u MLA ka Nongkrem u Bah Ardent Miller Basaiawmoit u la kylli lada la shim kam ne em ïa ka kompani kaba la ieh ïa ka jingtrei khlem da pyndep, ïa kaba u Bah Tynsong u la jubab ba watla ka jingtrei kam hap hapoh ka jingpeit jong ka PWD ka jylla, u la ïathuh ba ka tnad Road Transport & Highways jong ka sorkar India ka la leh ïa kaba donkam.
“Haba la pyllait ïa ka tender, ka tnad ka la khot ïa ka kompani bad la pyndep ïa ki kam baroh bad hadien la bynshet ïa ka kam ryngkat ki katto katne ki kyndon hashwa ban ai ïa ka final work order. Kawei na kita ki kyndon ka long ba lada ka kompani kam lah ban pyndep ïa ka kam lane ka ieh noh ïa ka kam khlem pyndep, ka kompani kan duh noh ïa ka security deposit kaba ki la siew,” u la ong.
