SHILLONG:
U Conrad K Sangma, Myntri Rangbah ka Meghalaya u la ïathuh ba ka sorkar jylla ka la wad ïa ia ki dkhot ka Expert Committee kiba biang bad ki bym ïashah liang khnang ban ïaid beit bad ban ym noh shiliang kaba pynbeit ïa ka Reservation Policy.
“Ka Search Committee ka la dep peit bniah ïa ki kyrteng, hynrei ngi kwah ïa ki briew kiba biang khnang ba ngin lah ban ïoh ïa ka komiti kaba biang, kaba ïaid beit, ka bym ïashah liang bad kaba laitluid khnang ba kan biang ka kaiphot ka ban mih”, ong u Myntri Rangbah.
U la ban jur ba ki dkhot ka komiti kim dei na shabar ka jylla. “Ka jingstad bad kyrdan pule jong ki dkhot bad ka jinglah ban treikam kan long ka jingjied kaba hakhmat eh jongngi bad lada don ka jingïahap tarajur, ngin hap ban peit ïa kata ka bynta ruh”, u la ong.
Ka kam ba kongsan eh jong ka Expert Committee ka long ban peit bniah ïa ka Reservation Policy kaba la don lypa bad ban ai jingmynjur ïa bynta kiba dei ban pynbha bad ban pynthymmai.
