SOHRA:
Ka Cherra Presbyterian Secondary School bad ka Sohra Presbytery ka la dap pura ïa ka jingdap sha ka 175 snem ha ka jingshakri ha ka pule puthi bad la pyllong ïa ka jingrakhe pynkut ha ka 8 tarik Nohprah ha phyllaw ka skul.
U Lamphang ka ïingdorbar thawaiñ, u Bah Metbah Lyngdoh u la long kum u kongsan nalor u CEM u Bah Titosster Well Chyne, ki nonghikai, ki khynnah skul, ki kmie ki kpa bad kiwei.
Ka Cherra Presbyterian Secondary School ka dei kawei na ki skul kiba la rim tam ha ka jylla bad kaba la lah ban rakhe ïa ka jingdap 175 snem naduh ba la sdang ïa ka.
“Nga sngew kmen ban ïohsngew ba kane ka skul ka la pynmih bun ki khynnah skul kiba la long ki riew pawkhmat bad pynmih ruh ki nongmihkhmat kum u symbud lamphang barim jong ka Lok Sabha u Prof. G.G Swell uba la khlad noh bad ar ngut ki Myntri Rangbah kiba kynthup ïa u Bah BB Lyngdoh bad u Dr. Donkupar Roy kiba la khlad noh bad u Bah S.P. Swer u ba long nongmihkhmat uba nyngkong eh sha ka Ïing Dorbar Thaw Aiñ na Sohra konstitwensi, bad kiwei kiwei ki dei ki khynnah ba la pass na kane ka skul,” la ong u Bah Lyngdoh.
U Bah Metbah u la ai ruh ka jingïaroh ïa ki nongseng jong ka skul bad ki missionary kiba la seng ïa ka jaka pule bad ïa ka jinglah jong ki ban trei na ka bynta ki jaitbynriew bad ban ai jingïaroh ruh ïa ki pastor, ka managing committee jong ka skul bad ka presbytery ïa ka jinglah jong ka ban kyntiew ïa ka skul kumba ka long mynta.
U la ong ba ka skul kam dei tang ban pynmih ïa ki khynnah skul hynrei ka dei ban pynmih ki khynnah skul kiba kynsai kumba dawa ka kyrteng jong ka skul, ba ki khynnah kin lah ban wanrah nam ïa ka skul bad ïa ka jylla baroh kawei.
U lamphang ka Ïing Dorbar, u ai khublei ruh ïa ki nonghikai namar ka jingdon bynta jong ki kaba khraw bad jingkitkhlieh ban pynjanai ïa ka jingmut jingpyrkhat bad jingim jong ki khynnah. Shuh shuh, u la ong ba ka skul ka dei ban ïai bteng ban pynmih shuh ki nongmihkhmat bad nongïalam kiba janai, kiba don ka jingkitkhlieh ban trei na ka bynta ka jaitbynriew.
Ban kyntiew ïa ka skul sha ka higher secondary, u Bah Metbah u ai ka jingmynjur ba kane ka skul ka la donkam ban shah pynkyntiew sha ka higher secondary school.
