NONGSTOIÑ:
Ka kynhun Seng ba kynthup ïa ka Hynñiewtrep Youth Council (HYC) bad ka Hynñiewtrep Achik National Movement (HANM), West Khasi Hills District ha ka sngi Baar jong ka taïew kala leit ban ïakynduh ïa u Deputy Commissioner ka WKH u Bah Garod LSN Dykes ban kyntu ïa u ba un pynkhlaiñ bor pahara ha ki shnong khappud ka WKH bad ka Jylla Assam.
Haba ïakren sha ki lad pathai khubor hadien ka jingïakynduh ïa u DC na ka liang jong u President ka Hynñiewtrep Achik National Movement u Bah Wilstone Sohshang u la ong ba ki ar Seng ki sngewkhia na ka jingjia ha Mukroh ba lehse ka lah ban ktah lang sa sha ki shnong khappud ka WKHD.
U la ong ruh ba ki ar Seng kila kyntu ïa u DC ban pynkup bor pura ïa ki pulit kiba don ha ki khappud khnang ba kin lah ban ai jingïada ïa ki paidbah lada don kino kino ki jingjia kiba ktah ïa ka shongsuk shongsaiñ ha ki shnong khappud.
“Haba kdew ïa ka jingjia ha Mukroh u Bah Sohshang u la long ba ka long kaei kaei kaba sngewthamula ban tip ba ki briew kiba don ha ki uniform ha ryngkat ki atiar kin hap ban ap shwa ïa ka hukum haba ka um saw kala wan ban tyllep”.
Ha kaba ïadei pat bad ka rai jong ka sorkar ban buh ktem pulit ne Border Outpost ha manla ki jaka ba don jingïakajia u Bah Sohshang u la ong ba ka sorkar kadei ruh ban pyntreikam pura ïa kita ki out post bad ban pynkup bor ïa ki pulit khnang ba kin lah ban ai ka jingshngaiñ ïa ki paidbah. Ha kawei pat ka liang ki ar Seng kila dawa ruh na u DC ba un pynkhlaiñ ïa ki bor pahara ha sor Nongstoiñ khnang ban ïada bad khanglad na kino kino ki kam sniew kam smeh bad khamtam ban ïada na ki jingjia ïatakhuh kali kiba khah khah bad ki jingshongshit khawïang jong ki nongñiah kali.
