SHILLONG:
Ka JETS 24X7 ka la dawa na u Chief Executive Member (CEM) ka Khasi Hills Autonomous District Council (KHADC) ban khang kaba ai Trading Licence ïa kiwei pat kiba pynïaid ïa ki taksi kamai.
Ha ka shithi ba la phah sha u CEM, ka JETS 24X7 ka la ïathuh ba ka dei ka nongpynïaid ïa ki thuk thuk kamai na ka bynta ki paidbah nongleit nongwan ha ka jylla, ha kaba ka thong jong ka, ka long ban plie lad ai kam ai jam ia ki samla Khasi bad ban kyntiew ïa la ki jong.
Ka la kdew ruh ba la seng ia ka JETS 24×7 na ka bynta ban ai jingshakri ïa ki paidbah da kaba pynïaid ïa ki thuk thuk lyngba ki Mobile Application App hapoh ka jylla Meghalaya bad ïa ka JETS la ithuh da ka sorkar Meghalaya bad ka la ïoh ruh ïa ka laisen na ka sorkar lyngba ka Transport Department.
“Lyngba kane ka shithi ngi kum ka JETS 24×7 ngi wanrah ïa kane ka jingthoh ha ka miej ba don burom jong phi ban pyrshah ïa ka jingai Trading License ïa kino kino ki bar jylla lane ki company kiba nabar kiba thmu ban ïoh ïa ka License ban pyntreikam ïa ki kali kamai da kaba pyndonkam ïa ka internet ( Taxi Aggregator ). Ka jingkhang pyrshah ka jongngi ka long katkum ka aiñ ba la buh bad pynskhem da ka District Council jong ka United Khasi Jaintia Hills District (Trading by Non- Tribals) Regulation, 1954 (As Amended), Section 3A (1) (b)”, ïathuh ka shithi ba la phah sha u CEM ba la soi da u Bah Pynskhlemlang W Uriah, Managing Director ka JETS24X7.
Kumta ka JETS 24×7 ka buh ïa ka jingkyrpad ban khang pyrshah kaba ai Trading Licence katkum ka ain khnang ban long ka jingkyrkhu ïa ki samla samhoi wad kam wad jam ha ka jaidbynriew lajong.
